Bu gün Azərbaycanda yas mərasimləri toylardan daha təmtəraqlı keçirilir. Ölü sahibi 3, 7, 40, cümə axşamları, nəhayət, il mərasimlərinin keçirilməsi üçün kifayət qədər xərcə düşür. Bəs bütün bunlar İslam dinində necədir? Həqiqətən, dində insanlara bu cür günlərin keçirilməsi buyurulubmu?
Xeberle.com-un məlumatına görə, Dini Qurumlarla İş üzrə Dövlət Komitəsinin sabiq sədri, "İrşad” İslam Araşdırmaları Mərkəzinin direktoru Rafiq Əliyev modern.az-a açıqlamasında bildirib ki, həmin günlərin keçirilməsi yalnız şəriət qanunlarından irəli gəlir:
"3, 7, 40 rəqəmlərinin öz məzmunu və mənası var. Lakin Azərbaycandakı kimi ölünün ardınca 3, 7, 40 verən heç bir müsəlman dövlət yoxdur. Bu günlərin keçirilməsi birbaşa "Qurani-Kərim”də deyilmir. Sadəcə bu, şəriət qanunlarıdır. Allahın dediyi kəlamlar deyil. İnsanların sonradan qəbul etdikləri adətlərdir”.
R.Əliyev yaslardakı xərclərdən də söz açıb: "Düşünürəm ki, bu xərclər, ümumiyyətlə, olmamalıdır. İslamda bunlar yoxdur. Digər müsəlman dövlətlərində, məsələn, Ərəbistan ölkələri, Əlcəzair, Misir, Yəməndə insan dünyasını dəyişən zaman bir az kədərlənirlər. Yeddinci günə qədər qohumlar gəlib başsağlığı verir. Uzağı bir stəkan çay və ya kofe içirlər. Azərbaycanda bu, belə deyil. İnsanlar kifayət qədər xərcə girirlər. Bu, bizim İslama gətirdiyimiz "yenilikdir”.
Ölünün ardınca əgər kimsə ehsan vermək istəyirsə, məsciddə və ya məscidə yaxın yerlərdə kasıb və ac insanlara verə bilər. Yasların təmtəraqlı keçirilməsi adət-ənənədən başqa şey deyil, amma heç də yaxşı hal olmadığını vurğulamaq lazımdır”.
Xəbərdən istifadə edərkən istinad etmək vacibdir.
