"Əlil Qadınlar” Cəmiyyəti Sumqayıt şəhər şöbəsi və "Toxunma Dünyası” Kurslarının təşkilatçılığı ilə Sumqayıt şəhərində 2 gün fiziki və sağlamlıq imkanları məhdud şəxslərin əl işlərindən ibarət satış-sərgi təşkil olunub.
Sərgidə "Əlilliyi Olan Şəxslərin Sosial Müdafiəsinə və İnteqrasiyasına Dəstək” İctimai Birliyinin üzvüləri olan fiziki və sağlamlıq imkanları məhdud şəxslərin əl işləri nümayiş etdirilib.
Açılışda çıxış edən təşkilatın rəhbəri Səbinə Kərimova sərginin təşkilində məqsəd fiziki imkanları məhdud şəxslərin yaradıcılıq potensialının inkişaf etdirilməsinə, onların cəmiyyətə aktiv inteqrasiyasının təmin olunmasına, cəmiyyətdə xüsusi qayğıya ehtiyacı olan insanlara diqqətin artırılmasına xidmət etdiyini bildirib.
Daha sonra Sumqayıt şəhər İcra hakimyyətinin nümayəndəsi Fərman Kazımov, "Toxunma Dünyası” Kurslarının rəhbəri Bahar İsmayılova, öz ürək sözlərini iştirakçılara bildirib və açılışda iştirak edən şəhər ictimaiyyəti sərgi ilə tanış olub.
Satış-sərgidə rəsm, bədii tikmə, toxuma və hörmə, təkəlduz, ağac üzərində oyma və muncuqlu işləmələr və s. növlərdə 200-dən çox əl işi nümayiş olunub. Sərginin sonunda əsərlərin satışı təşkil edilib.
Xəbərdən istifadə edərkən istinad etmək vacibdir.
