Teref.info yazır ki, bu günlərdə sosial şəbəkələrdə əməkdar artist Ağalar Bayramovun "Mən o bənövşəni niyə dərmədim” başlıqlı şer-videosu yayılıb. ”Youtube.com”-da bu şeri öz adından yayan şəxs "şair Vidadi Ağdamlı” kimi göstərilib. Di gəl, Ağdamlı "şair” şerin yazarının 3 ay öncə dünyasını dəyişən şair Sabir Sarvan olmasını vurğulamağı "unudub” . Şeri anonim təqdim etməklə gerçəkdə dinləyicilərdə yazarın özü olduğu fikrini formalaşdıran Vidadi Ağdamlı bu oğurluqla sözə də, şerə də, şairə də , şairin ruhuna da sayğısızlığını ortaya qoyub. Aldığımız bilgiyə görə, Azərbaycan Yazıçılar Birliyinin Sumqayıt Bölməsi , şairin qələm dostları, yaxınları söz, şer oğurluğundan üzüntü içindədir və oğrudan sözü, şeri yiyəsinə "qaytarmağı” tələb edirlər. Yəqin ki, Müəllif Hüquqları Agentliyi də oğurluğa-plagiata görə görəvini görəcək. 
Sabir Sarvan heç vaxt ,ən çətin anda belə SÖZƏ üz çevirmədi,SÖZƏ xəyanət etmədi, "boşuna yaşasa” da, boşuna SÖZ demədi . SÖZÜN "qabağından qaçmağını”, yıxılmağını da Tanrını heyrətləndirmək istəyi ilə bağladı . Tanrıdan bir də yaradılsa, yenə SÖZƏ qul olmağını dilədi . Şair öldü deməyin, SÖZÜ qalır ...
SÖZÜ oğurlamaq , RUHU oğurlamaq SÖZ yiyəsinin işi olmaz . 
"SÖZDƏN O YANASI YOXDUR, SÖZDƏN O YANA MƏN VARAM” deyən Sabir Sarvanın "qəbrinin üstündə küskün bənövşə bitməmiş” o BƏNÖVŞƏNİ başqası adına çıxır?
"Yandırıb-yaxacaq məni ölüncə”...
Məğrur Bədəlsoy

Xəbərdən istifadə edərkən istinad etmək vacibdir.