Azərbaycan Respublikasının Prezidenti yanında Qeyri-Hökümət Təşkilatlarına Dövlət Dəstəyi Şurasının maliyyə yardımı ilə "Qadın Təşəbbüsü və Sosial Problemlərin Həllinə Yardım” İB-nin aprel ayının 15-dən "Insan alverinin potensial qurbanlarının maarifləndirilməsi və onlara sosial xidmətlərin təşkili, insan alveri ilə mübarizə sahəsində çalışacaq mütəxəssislərin hazırlanması” layihəsinin icrasına başlamışdır. Layihənin icrası Sumqayıt şəhərini və ona yaxın 12 şəhər və rayonu əhatə edir.
Layihənin əsas məqsədi çərçivəsində keçirilmiş tədbirlər nəticəsində gender ayrı-seçkilyinin, zorakılığın qurbanı olmuş şəxslərin, onların yaxınlarının, insan alverinin qurbanı olmuş və ola biləcəyi riski ilə bağlı təşkilata müraciət etmiş bütün şəxslərə hüquqi,psixoloji,sosial,tibbi yardımlar göstərilir.
Layihə çərçivəsində Mərkəzin ofisində müraciət edən hər bir şəxs üçün fərdi psixoloji konsultasiyalar, hüquqi, sosial, tibbi yardımlar təşkil olunub. Mərkəzin ofisində 6 gün 8 saat xidmət göstərən "Etimad” telefonu fəaliyyət göstərir. Zəng edənlərin hər birinnə ilkin psixoloji,hüquqi yardımlar göstərilir.
Bu zaman ərzində Təşkilata müraciət etmiş 38 nəfərə hüquqi yardım, 42 nəfərə psixoloji, 21 nəfərə sosial, 5 nəfərə tibbi yardımlar göstərilib. Etimad telefonu vasitəsilə 30 nəfərə ilkin psixoloji və hüquqi yardımlar edilib. Ümumilikdə isə 136 nəfərə xidmət göstərilib.
Qeyd edək ki, ilkin olaraq layihə barəsində ictimaiyyət məlumatlandırılıb və təqdimat mərasimi keçirilib. Təqdimatda hüquqşunaslar,psixoloqlar, QHT nümayəndələri, KİV nümayəndələri olmaqla 18 nəfər iştirak etmişdir.
Tədbir iştirakçıları layihə çərçivəsində nəzərdə tutulmuş xidmətlər, layihə benefisiarlarının kimlər olacağı, layihənin əhatə edəcəyi çoğrafi zonalar, layihə çərçivəsində nəzərdə tutulmuş tədbirlər haqqında məlumat əldə etmişlər.
Layihə çərçivəsində benefesiarlar üçün nəzərdə tutulan xidmətlər barədə daim olaraq yerli telekanalda,sosial şəbəkələrdə elanlar verilir. Bukletlər çap olunaraq əhali arasında paylanılır.
İyunun 24-də isə təşkilatın Sumqayıt şəhərində yerləşən ofisində "İnsan alveri qurbanlarına psixoloji dəstək, etik davranış” mövzusunda təlim keçirilib. Təlimdə 31 nəfər olmaqla psixoloqlar və QHT nümayəndələri iştirak ediblər.
Təlimdə ekspert qismində Azərbaycan Respublikasının Əmək və Əhalinin Sosial Müdafiə Nazirliyinin İnsan alverinə qarşı mübarizə Mərkəznin rəhbəri Nəzakət Balabəyova çıxış edib.
Təşkilatın ofisində insan alverinə aid qanunvericilik bazası ,ölkədə və regionda insan alveri sahəsində vəziyyəti barədə məlumatlar bazası hər ay yenilənərək maraqlanan hər bir şəxsin ixtiyarına verilib.
Birlik tərəfindən layihəyə cəlb edilmiş könüllülərin dəstəyi ilə regionlarda insan alveri sahəsində mövcud vəziyyətin öyrənilməsi ilə bağlı sorğular təşkil edilir. Sorğular regionlarda yaşayan əhali və regionlarda fəaliyyət göstərən ictimai təşkilatlar arasında aparılır.
Layihə dövründə əhalinin müxtəlif qrupları arasında 4 sorğu keçirilməsi nəzərdə tutulub.
Layihə müddətində gələcək aylarda da bir sıra tədbirlərin təşkili nəzərdə tutulub. Keçiriləcək tədbirlər barədə KİV-də, sosial şəbəkələrdə elanlar veriləcək.
Xəbərdən istifadə edərkən istinad etmək vacibdir.
