Sumqayıt şəhər Təcili və Təxirəsalınmaz Yardım Stansiyasına cari ilin 6 ayı ərzində 58 mindən artıq müraciət daxil olub.

Stansiyadan Xeberle.com-a verilən məlumata görə, 2016-cı ilin müvafiq dövrü ilə müqayisədə müraciətlərin sayı 1500-dən çox azalıb. Müraciətlər üzrə əhaliyə zəruri tibbi yardım göstərilib. Sumqayıt şəhər Təcili və Təxirəsalınmaz Yardım Stansiyasına daxil olan müraciətlər əsasında 4001-dən çox vətəndaş xəstəxanalara yerləşdirilib. Bu müddət ərzində bədbəxt hadisə və zədələnmələrlə bağlı müraciətlərin sayı 900-dən artıq, doğuşla bağlı müraciətlərin sayı 187, qəfləti xəstəliklərlə bağlı müraciətlərin sayı isə 23 mindən artıq olub. 6 ay müddətində hər min nəfər əhaliyə düşən müraciətlərin sayı 151, orta sutkalıq müraciətlərin sayı isə 321 olub. Qeyd edək ki, yarım il müddətində 834 nəfər dünyasını dəyişib. Müqayisə üçün deyək ki, ötən il bu rəqəm 695 nəfər təşkil edirdi. Evdə qalan ağır xəstələr haqqında ərazi üzrə müvafiq poliklinikalara məlumat verilb. Digər tibb müəssisələri ilə sıx əlaqəli işin təşkilinə xüsusi diqqət yetirilir. Çağırış zamanı aşkar edilən zahı və hamilə qadınlar barəsində qadın məsləhətxanasına məlumat verilir.