Artıq 3 ilə yaxındır Suriyada qanlı döyüşlər gedir. İlk əvvəl baş verən hadisələr barədə doğru məlumatlar alınmasa da, artıq hadisələrdən bir qədər keçdikdən sonra olsa belə, həqiqəti üzə çıxarmaq mümkün olur. Hadisələr barədə ilk vaxtlar ona görə düzgün məlumatlar alınmırdı ki, bütün baş verənlər sanki bir mənbədən yayılır və bununla da birtərəfli xəbər formalaşırdı. Amma zaman keçdikcə xəbər mənbələri artdı və müqayisələrlə əsl həqiqəti tapmaq asanlaşdı.
Suriyada yaşanan qanlı toqquşmalarda əsas günahkar kimik Bəşşar Əsəd hakimiyyəti göstərilsə də, nədənsə onun əslində kimlərlə döyüşdüyü barədə heç nə deyilmirdi. Daha doğru qarşı tərəfin Azad Suriya Ordusu olduğu və ölkə müxaliflərindən təşkil edildiyi söylənirdi.
Adətən hər hansı bir ölkənin qonşuluğunda müharibə gedirsə, həmin ölkə ilə sərhədlər ya tamamilə bağlanır, ya da sadəcə qaçqınların keçidinə icazə verilir. Amma Suriya hadisələrində xüsusən Türkiyənin canfəşanlıq edərək oraya müdaxilə olunmasına çalışdığı, Azad Suriya Ordusuna dəstək göstərilməsinin vacibliyini vurğuladığı görünürdü. Bura açıq sərhədi də əlavə etsək lap yerinə düşər.
Amma sonra məlum oldu ki, Suriyada hakimiyyətə qarşı döyüşənlər heç də ölkə müxaliflərindən təşkil edilməyib və oradakılar dünyanın müxtəlif bölgələrindən gəlmiş və ya gətirilmiş vəhhabi terrorçularıdır. Onların Suriyaya əsas keçid nöqtələri isə məhz Türkiyədir. Belə silahlılar azad şəkildə Türkiyə-Suriya sərhədindən keçərək döyüşlərə qatılırlar, yaralılar da məhz Türkiyənin sərhədə yaxın xəstəxanalarında müalicə alırlar. Bu barədə dəfələrlə Türkiyə mediası da yazıb. Hətta CNN həmin terrorçuların necə keçdiyini, hansı evlərdə qaldıqlarını, harada müalicə aldıqlarından bəhs edən gizli çəkiliş aparılmış video da təqdim etmişdi.
Artıq bir neçə aydır Azərbaycan üçün də daha aydın oldu ki, orada döyüşənlər içərisində azərbaycanlılar da üstünlük təşkil edir. Valideynlərinin mediaya verdiyi açıqlamadan bildik ki, özlərinin sələfi adlandıran bu şəxslər Gürcüstandan keçməklə Türkiyə ərazisindən Suriyaya gedirlər. İlk əvvəl məhz sələfilərin nəzarətində olan media orqanları və bəzi şəxslər Suriyada azərbaycanlıların döyüşməsi barədə faktları təkzib etdilər, amma sonradan Türkiyə mediasında yayımlanan şəkillər, şəxsiyyət vəsiqələri, pasportlar həqiqətləri ortaya çıxardı. Baxmayaraq ki, elə indinin özündə də Azərbaycan Xarici İşlər Nazirliyi Suriyada vətəndaşlarımızın döyüşməsini birbaşa inkar etməsə də, təsdiq də etmir. Sadəcə ünvanlanmış suallara verilən cavab bu cür olur ki, orada Azərbaycanın hər hansı bir nümayəndəliyi olmadığı üçün, əlaqə yarada bilmirik. Belə olduqda alternativ sual yaranır: məgər nümayəndəlik olsa, guya nümayəndəliyin təmsilçisi gedib oradakı terrorçulardan bir-bir soruşacaq ki, siz doğrudan da Azərbaycan vətəndaşısınız?
Unudulan bir şey var; artıq XXI əsrdir, hər şeyi öz adı ilə çağırmaq lazımdır. Əgər orada döyüşənlər Azərbaycanca müraciət edirlərsə, əgər orada döyüşənlərin üstündən Azərbaycan pasportu çıxırsa, əgər orada döyüşənlərin şəkilləri sosial şəbəkələrdə yayılaraq, altından, “əxi, Allah şəhadətini qəbul etsin” kimi sözlər yazılırsa, əgər bu öldürülənlərdən sonra bir qisim valideyn çıxıb etiraf edirlərsə ki, övladları Suriyada döyüşməyə gedib, bir neçə dəfə hətta danışıblar da, əgər sosial şəbəkələrdə özlərini sələfi adlandıranlar, “əxilər, dua edin, bu gün axşam ağır döyüşümüz var” yazırlarsa, burada gizlədiləsi nə var ki?
Apardığımız araşdırmalar nəticəsində son döyüşlərdə öldürülən təxminən 10 nəfər azərbaycanlının hələ indiyə kimi yayılmamış fotolarını tapdıq. Araşdırmamız nəticəsində o da məlum oldu ki, orada döyüşən azərbaycanlıların əksəriyyəti “Seyful Azəri” ləqəbli vəhhabinin komandanlığı altındadırlar. Onlar içərisində daha fəal olanlardan isə “Emin Nadirov”, “Ənəs əl-Azəri”nin adlarını çəkirlər.
Bir məsələni də qeyd edək ki, Suriyada döyüşən azərbaycanlıların heç biri öz adı ilə çağırılmır. Ona görə də onlara verilən Əbu Yəhya, Həbibullah, Seyful Azəri kimi adlar heç bir rəsmiyyət daşımır.
/faktxeber.com/
Rüstəm Həbibullah
Əbu Yəhyanın qəbri
Emin Nadirov
Ənəs əl-Azəri
Seyful Azəri
Xəbərdən istifadə edərkən istinad etmək vacibdir.
