Səbail rayonunun polis və prokurorluq orqanları əməkdaşları tərəfindən həyata keçirilmiş əməliyyat-axtarış tədbirləri nəticəsində rayon ərazisində yol-nəqliyyat hadisəsi törədərək Əkbərova Könül Elton qızının ölümünə səbəb olan şəxs həbs edilib.
Baş Prokurorluqdan verilən məlumata görə, noyabrın 8-də Səbail rayonu ərazisində 2000-ci il təvəllüdlü Məmmədov Arif Məmməd oğlu (ad, soyad şərtidir) idarə etdiyi "Cip Qrand Çerok" markalı 90 FO 007 dövlət nömrə nişanlı avtomobili ilə yolu keçmək istəyən 1975-ci il təvəllüdlü Əkbərova Könül Elton qızını vurub. Piyada aldığı xəsarətlərdən hadisə yerində vəfat edib.
Sürücülük hüququ olmayan, yetkinlik yaşına çatmayan Məmmədov Arif Məmməd oğlunun əməli Cinayət Məcəlləsinin 263-1.3 (nəqliyyat vasitələrini idarə etmək hüququ olmayan şəxs tərəfindən yol hərəkəti və nəqliyyat vasitələrinin istismarı qaydalarını pozma, ehtiyatsızlıqdan zərərçəkmiş şəxsin ölümünə səbəb olduqda) və 264-cü (yol nəqliyyat hadisəsi yerindən qaçma) maddələrinə tövsif edilib.
İş üzrə təqsirləndirilən şəxs qismində cəlb olunan A.Məmmədova Cinayət Məcəlləsinin həmin maddələri ilə ittiham elan edilməklə məhkəmənin qərarı ilə barəsində həbs qətimkan tədbiri seçilib.
Nəqliyyat vasitəsinə sahiblik hüququ olan Əmrulla Şahbazov tərəfindən nəqliyyat vasitəsini idarə etmək üçün idarəetmə hüququ olmayan şəxsə verilməsinə görə sonuncunun inzibati qaydada məsuliyyətə cəlb edilməsi təmin olunacaq.
Qeyd edək ki, 3 uşaq anası olan Könül Əkbərovanı noyabrın 8-də, 19:30-da Bayraq meydanı yaxınlığında "Cip" markalı, 90 FO 007 nömrə nişanlı avtomobil vurub. Könül Əkbərova şəhid Elton Əkbərovun qızıdır. Avtomobili idarə edən və şəhid qızının ölümünə səbəb olan şəxsin iş adamı Akif Rəhimovun oğlu - 17 yaşlı Rəhim Rəhimov olduğu deyilir. Məlumata görə, R.Rəhimlinin atası Xırdalan-Xəz Açıq Tipli Səhmdar Cəmiyyətinin direktorlar şurasının sədridir.(axar.az)
Xəbərdən istifadə edərkən istinad etmək vacibdir.
