Xeberle.com olaraq "Sumqayıtın fəxri vətəndaşlarını tanıyaq” rubrikasına davam edirik. Bu dəfə haqqında bəhs edəcəyimiz fəxri vətəndaş Zəminə Həsənovadır. O, həm də Sosialist Əməyi Qəhrəmanıdır.
Sumqayıtdan boylanan dan ulduzu
Zəminə Həsən qızı Həsənova 1918-ci ilin mayın 10-da Sumqayıtda, indiki Corat qəsəbəsində (Corat qəsəbəsi əvvəllər Bakı Quberniyasına məxsus idi) anadan olub. O, əmək fəaliyyətinə Sumqayıt Elektrik Stansiyasında başlayıb. Sovet dövründə Energetika Birliyinin sədri vəzifəsində çalışıb və yaşayış binalarının bünövrəsinin qoyulması ilə məşğul olub. Böyük Vətən Müharibəsi illərində Bakının vətəndaş müdafiəsi sistemində fəaliyyət göstərib. Müharibədən sonra əmək fəaliyyətini Azərbaycanın Lenin adına "Boruprokat” zavodunda operator kimi davam etdirib. Daha sonra briqadir vəzifəsində çalışıb. SSRİ-nin Ali Sovetinin Prezidiumunun qərarı ilə 7 mart 1960-cı ildə Beynəlxalq Qadınlar Günü münasibətilə və əmək fəaliyyətindəki uğurlarına görə Lenin ordeni və Sosialist Əməyi Qəhrəmanı adı və "Oraq və Çəkic" qızıl medalı təltif edilib. 1969-cu ildə isə Sumqayıtın fəxri vətəndaşı adına layiq görülüb.
Brejnevin ağlatdığı sumqayıtlı sosialist əməyi qəhrəmanı
Z. Həsənova mətbuata verdiyi müsahibələrin birində o günləri belə xatırlayır: "Zavodumuzun istehsal etdiyi borular Hindistana, Rumıniyaya, Misirə, Kubaya, Almaniyaya, Polşaya və sair ölkələrə göndərilirdi. Müəssisəmizin şan-şöhrəti gündən-günə artırdı. Bizi başqalarına nümunə göstərirdilər. 1960-cı il idi. Məni Moskvaya qadınların Beynəlxalq 8 Mart bayramına nümayəndə kimi göndərmişdilər. Bu mənə böyük etimad idi. Moskvada xəbər tutdum ki, mən «Sosialist Əməyi Qəhrəmanı» adına layiq görülmüsəm. Qulaqlarıma inanmadım. Mənə, adi bir kəndli qızına belə bir fəxri adının verilməsinə inana bilmirdim. Sonra qurultaylar sarayında böyük iclas keçirildi. Sovetdər birliyində böyük nümayəndə heyəti həmin iclasda iştirak edirdi. Hamının gözlərində bir sevinc, bir fərəh vardı. Mənim də gözlərim yaşarmışdı. İclasdan sonra bizi SSRİ Ali Sovetində qəbul etdilər. Ali Sovetin sədri Leonid Brejnev ordeni mənə təqdim edib, təbrik etdi, xoş sözlər söylədi. Sevincdən özümü saxlaya bilməyib ağladım. Sonra bir az toxtadım, qısa çıxış etdim. Dedim ki, bu fəxri ad təkcə mənə yox, bütün Azərbaycan metallurqlarının əməyinə verilən böyük bir fəxri addır."
Z. Həsənova 1970-ci ildə isə baş briqadir olub və həmin zavodda 4 briqadaya rəhbərlik edib. Z. Həsənova Azərbaycanın ictimai həyatında da fəal iştirak edib. Məktəbli uşaqlar üçün yaradılan "Horizont 8" klubunun təşkilatçılarından biri olub. O, dəfələrlə Sumqayıt Şəhər Şurasının deputatı seçilib, VI Çağırış SSR Ali Sovetinin deputatı olub. Bununla yanaşı, SSRİ Həmkarlar İttifaqları XV Konqresində iştirakçı qismində iştirak edib.
2002-ci ilin 2 oktyabr tarixində Azərbaycan Prezidentinin sərəncamıyla Zəminə Həsənova elm, təhsil, mədəniyyət, iqtisadiyyat sahəsində göstərdiyi fəaliyyətinə və böyük əməyinə görə, Azərbaycan Prezidentinin fərdi təqaüdünə layiq görülüb. Görkəmli metallurq Z.Həsənovaya Ələkbər Tağıyevin bəstələdiyi, sözləri R.Zəkaya məxsus "Zəminə” adlı mahnı həsr olunub və müəllifinin Z.Əliyeva olduğu kitab da yazılıb.
O,ı 2006-cı ildə Sumqayıt şəhərində vəfat edib və onun xatirəsini əbədiləşdirmək üçün yaşadığı binaya xatirə lövhsiə vurulu.
Qeyd edək ki, Z.Həsənova Sumqayıtın 3-cü fəxri vətəndaşı və Azərbaycanın ilk metallurq qadını olub.
Elnarə Salamova
Xeberle.com
Xəbərdən istifadə edərkən istinad etmək vacibdir.
