"UNEC istedadları” layihəsində maraqlı komikslər yaradan tələbə Nəzrin Əlizadəni təqdim edirik:
Nəzrin Əlizadə 1999-cu ildə Bakıda anadan olub. Orta təhsilini 19 nömrəli tam orta məktəbdə alıb. Hazırda UNEC-in 2-ci kursunda biznesin idarəedilməsi ixtisası üzrə qiyabi təhsil alır. Eyni zamanda Azerbaijan Coca-Cola Bottlers şirkətində və UNEC Enactus komandasında qrafik dizayner kimi fəaliyyət göstərir.
Uşaq vaxtından rəsmə və komikslərə olan marağı onu baş qəhrəmanı özü olduğu komikslər aləminə gətirib. Komikslərini dizayn proqramları vasitəsilə kompüterdə hazırlayan Nəzrinin silsilə komiksləri sosial şəbəkələrdə geniş yayılıb. Böyük Britaniya və Türkiyənin məşhur internet komiks səhifələrində onun komiksləri tərcümə olunaraq paylaşılır və istinad edilir. Dizayn etdiyi açıqça və dəvətnamələrə ABŞ, Çexiya və Cənubi Koreyada böyük maraq var.
N.Əlizadənin şirkət üçün hazırladığı reklam posterlərinə ölkənin bir çox iaşə xidməti müəssisələrində və kinoteatrlarında rast gəlmək mümkündür. Onun ən böyük arzusu komiks jurnalı nəşr etmək və özünün yaratdığı komiks personajlarından ibarət cizgi filmləri yaratmaqdır. Nəzrin komikslərində təsvir etdiyi mövzuları real həyatdan götürdüyünü deyir. O, UNEC-in Enactus komandasının üzvlərinin komiks personajlarını da yaratmağı unutmayıb.

 

 

 

 

 

 

 

Xəbərdən istifadə edərkən istinad etmək vacibdir.