Azərbaycan Milli Elmlər Akademiyasının Nəsimi adına Dilçilik İnstitutunda “Gənclər günü” keçirilib. İnstitutdan Xeberle.com-a verilən məlumata görə, adıçəkilən elm ocağının direktoru, AMEA-nın müxbir üzvü, professor Tofiq Hacıyev gənclərlə bağlı belə bir əlamətdar günün tarixi-mənəvi dəyərindən bəhs edib. Gənclərlə Dilçilik İnstitutunun keçmişi, bir vaxtlar bu elm ocağında çalışmış görkəmli alimlər haqqında xatirələrini bölüşüb, elmdə ənənə və varislik xəttinin qorunmasının vacibliyini bildirib. Həmçinin institutun gənc əməkdaşlarını məşğul olduqları tədqiqat sahələri üzrə fəallığa, keçmişin ənənənələri üzərində dilçiliyimizin müasir inkişafına töhfə verməyə çağırıb.
İnstitutun Türk dilləri şöbəsinin böyük elmi işçisi, dosent Təranə Şükürova “Sələflər və xələflər” mövzusunda məruzə edib. O, Azərbaycanda toplantı iştirakçılarına gənclər gününün tarixi barədə məlumat verib. T.Şükürova məruzəsində 2 fevral gününün 1996-cı ildə Azərbaycan xalqının ümummilli lideri Heydər Əliyevin sərəncamı ilə “Gənclər günü” kimi rəsmiləşdirildiyini diqqətə çatdırıb. Qeyd edib ki, bu, Heydər Əliyevin gəncilyə göstərdiyi diqqət və qayğının bir nümunəsi idi. Gənclər günü MDB məkanında və Şərqi Avropa ölkələri arasında ilk dəfə olaraq Azərbaycanda qeyd olunub. T.Şükürova Azərbaycan dövlətinin bu gün həyata keçirdiyi gənclər siyasətinə toxunub, AMEA-nın Nəsimi adına Dilçilik İnstitunda çalışan gənc alimlər üçün yaradılmış şəraitdən bəhs edib. İnstitutun elmi işlər üzrə direktor müavini, filologiya elmləri doktoru, professor Məhəbbət Mirzəliyeva isə çıxışında bildirib ki, bütün dövrlərdə gəncliyə diqqət və qayğı vacibdir. O, AMEA-nın Nəsimi adına Dilçilik İnstitutunda da mövcud imkanlar daxilində daim gənc alimlərə dəstək olmağa çalışdıqlarını və bu xəttin gələcəkdə də davam etdiriləcəyini söyləyib. Toplantıda İnstitutun  qocaman əməkdaşlarından Hind-Avropa dilçiliyi şöbəsinin müdiri professor Oruc Musayev və  Gənc Alimlər Şurasının sədri Sevinc Əliyeva da çıxış ediblər. Daha sonra Dilçilik İnstitutda çalışan yaradıcı gənclərin bədii yaradıcılıqlarından nümunələr dinlənilib və gənclərdən bir qrupuna mükafatlar təqdim olunub.