Hava şəraitinin kəskin dəyişməsi özü ilə bir sıra problemlər də gətirdi. Sumqayıtdan da yan keçməyən problemlər İnşaatçılar qəsəbəsinin sakinləri üçün də dərd-sərə çevrildi. Yolumuzu bu dəfə sözügedən qəsəbədən saldıq. Əlli ilə yaxın tarixi olan yaşayış məntəqəsinin problemləri qəsəbəyə girər-girməz hiss olunurdu. Kələ-kötür yollar, köhnə binalar, palçıqlı və problemlərlə dolu Sumqayıt şəhər İnşaatçılar qəsəbəsinə çatdıq.  Qəsəbənin 16/39-cu binasının sakinləri deyirlər ki, yaşayış məntəqəsi səlahiyyətlilərin yadından çıxıb. Sakinlərin sözlərinə görə onların heç bir problemlərinə baxılmayıb və bu da onları narahat edir: “Qəsəbənin binaları da ən az özü qədər qədimdir. Artıq 4 gündür ki, qar yağıb. Bu müddətdə isə bizim yollarda marşrut işləmədi. Yollarımız bərbad vəziyyətdədir. Yolların hər yeri çala-çuxurlardır. Qarın əriməsini heç istəmirik. Çünki qarın əriməsi ilə problemlər ifrat dərəcəyə çatacaq. Hər yer palçıq, hər yer çirkab olacaq. Bu halda burada yaşayan insanlar nə etməlidir?! Axı burda da uşaqlar, qocalar yaşayır. Uşaqlarımız məktəbə getməlidirlər”.

Deyirlər ki, yollar belə olduğu bir vəziyyətdə uşaqlar məktəbə də gedə bilmirlər. Hələ bunlar azmış kimi quruyan ağaclar da sakinlərin narahatçlığına səbəb olub: “Ağacın budaqları binamızın damlarını məhv edib. Binanın şaxtası sıradan çıxmış vəziyyətdədir. Keçən günlərdə ağaclardan  birinin budağı qopub düşdü. Bəxtimiz gətirdi ki, heç kəs zərər çəkmədi. Bəs o budaq kiməsə zərər versəydi?! Bu zaman kim cavabdeh olacaqdı?”

Sakinlərin sözlərinə görə, qəsəbədə istilik sistemi də yoxdur və su xətləri köhnədir. Qəsəbə sakinlərinin daha bir şikayəti isə su ilə bağlıdır: "“Azərsu” ASC-nin quraşdırdığı smart-kart tipli su sayğacları şaxtadan donduğu üçün 4 gündür ki, susuz qalmışıq. Əlimizdə vedrələrlə neçə yüz metr yol gedib su daşıyırıq. Heç kəs köməklik etmir. Allahın ümidinə qalmışıq”.

Qəsəbə sakinləri problemlərlə bağlı aidiyyəti orqanlara  müraciət edtdiklərini bildirdilər: “Dəfələrlə Sumqayıt şəhər İcra Hakimiyyətinə müraciət etmişik. Çox xahiş edirik, artıq bununla bağlı bir tədbir görülsün. Belə vəziyyətdə yaşamaq istəmirik..!”

Ümidvarıq ki, aidiyyəti qurumlar Sumqayıtın İnşaatçılar qəsəbəsi sakinlərinin köməyinə gələcəklər.

Türkan Heydərova, Xeberle.com