Azad İstehlakçılar Birliyinə daxil olan şikayətlə bağlı dərhal aidiyyəti şöbələrə məlumat verilərək, araşdırılma aparıldı. Müştəri ilə əlaqə saxlanıldı və məhsulun geri qaytarılması üçün mağazaya dəvət olundu.

Xeberle.com xəbər verir ki,bu sözlər OBA mağazalar şəbəkəsindən Axar.az-a daxil olan məlumatda bildirilir. Açıqlamada vurğulanıb ki, xanımın qeyd etdiyi kimi, məhsulun keyfiyyətində hər hansı bir dəyişiklik olub-olmadığını yoxlamaq üçün məhsuldan nümunə götürüləcək və laboratoriyaya göndəriləcək:
"Jinkina krınka (Жинкина крынка) məhsulu Rusiyanın "Yastro" (Ястро) şirkətinin məhsuludur və ölkəmizə OBA marketlər şəbəkəsi tərəfindən idxal olunur. Qeyd edək ki, bu məhsul dünyanın ən böyük marketlər şəbəkəsində də satışdadır. Məhsulun müvafiq uyğunluq sertifikatları var və biz məhsulun saxlanma şəraitinə tam riayət edirik. "Qauda” pendirin növlərindən biridir və bərk olur. Yəqin ki, müştəri pendirin bu növü barədə məlumatsızdır. Qeyd edək ki, məhsulun istehsal tarixi və yararlılıq müddəti qablaşdırmanın üzərində qeyd olunub və məhsul 180 gün saxlanıla bilər.
Müştərinin nehrə yağı barədə şikayəti də istehsalçı şirkətə bildirildi. Qeyd edək ki, bu yağlar Uzun Ömür İvanovka MMC-nin məhsuludur. Bu məhsulun da müvafiq uyğunluq sertifikatları vardır.

Müştəri məmnunluğu bizim üçün önəmlidir. Biz məhsullarımızın keyfiyyətinə xüsusi həssaslıqla yanaşırıq. İstehsalçıdan gələn məhsullar öncə laborator yoxlanışlardan keçir. Keyfiyyətə Nəzarət Departamenti yalnız keyfiyyətli məhsulların satışa çıxarılmasına icazə verir. Müştərilərimiz mağazalarımızda hər hansı bir xoşagəlməz halla rastlaşarsa, "qaynar xətt”imizə (012924) zəng edə bilərlər. Bundan başqa, OBA marketlər şəbəkəsinin bütün filiallarında aidiyyəti üzrə rəhbər şəxslərin nömrələri kassalarda qeyd olunmuşdur. Şikayət və təkliflərinizi həmin nömrələrə də zəng edərək bildirə bilərsiniz”.
Qeyd edək ki, az öncə Mirzəyevə Dilşadxanım OBA marketdən aldığı məhsullarla bağlı şikayət etmişdi. Şikayət məktubunda qeyd edilirdi ki, Binəqədi rayonu Sulutəpə qəsəbəsi, döngə 11 ünvanında yerləşən OBA marketdən aldığı kefiyyətsiz malın geri qaytarılmayıb.

"Rusiyanın Omsk vilayətində istehsal olunmuş 600 qramlıq "Qauda” markalı pendir və "Uzun ömür” Süd məhsulları MMC-nin istehsalı olan 0.5 kq olan "Nur” markalı nehrə yağı aldım. İstehlak üçün 3 gün sonra açdıqda həmişə istifadə etdiyim "Qauda” pendirlərindən fərqli olaraq, aldığım pendirdə ciddi acılıq və sanki bükülmə materialından keçmiş xoşagəlməz ətirlik dadını hiss etdim. Diqqətlə baxdıqda pendirin üzərində Azərbaycan dilində məlumat olmadığını, saxlanma müddətinin rus dilində 180 gün yazılsa da, buraxılma tarixinin yapışqanlı kağızla yazıldığını gördüm. Güman edirəm ki, buraxılma tarixi sonradan yapışdırlmışdır. 0.5 kq-lıq nehrə yağının isə dəmir dadı verdiyini, nehrə yağına bənzəmədiyini, qabın üzərində 90 gün yararlıq tarixi göstərilsə də, yağın keyfiyyətsiz olduğunu gördüm. Malları soyuducuda saxladım. 23.07.2018-ci il tarixində qeyd olunan malları dükana apardım, satıcıdan malların yoxlanmasını və geri qaytarılmasını xahiş etdim. Qeyd edirəm ki, mallara dadına baxmaq üçün cüzi toxunulmuşdu. Satıcı mala baxmadan "toxunubsan" deyib pulumu qaytarmaqdan imtina etdi. Mən onu başa salmaq istədim ki, malı açmasaydım, onun keyfiyyətsiz olduğunu necə bilərdim? Lakin satıcı buna əhəmiyyət vermədi”, - şikayətçi bildirmişdi.