"Dövlət İmtahan Mərkəzi (DİM), yəni keçmiş Tələbə Qəbulu üzrə Dövlət Komissiyası (TQDK) ölkədə ən yüksək səviyyədə imtahan keçirən bir qurumdur. Təəssüflər olsun ki, bəzi ekspertlər, müəyyən fənlər üzrə ixtisaslı mütəxəssislər DİM-in adına xələl gətirirlər”.

 

Bu sözləri Xeberle.com-a açıqlamasında təhsil eksperti Kamran Əsədov 26 iyul tarixində keçirilən II ixtisas qrupu üzrə D variantı sual kitabçasında aşkarladığı səhvə münasibət bildirərkən qeyd edib. Onun sözlərinə görə, DİM-in keçirdiyi imtahanlar prosesində ekspertlərin səhlənkarlığı ucbatından vaxtaşırı bu kimi hallara rast gəlinir: "Onların səhlənkarlığına görə DİM-in nüfuzuna xələl gəlir. II ixtisas qrupu üzrə D variantında olan 91 saylı konstitusiyaya aid test tapşırığında iki doğru cavab var idi. Bu test tapşırığı konstitusiyanın 126-cı maddəsi ilə üst-üstə düşmür, ziddiyyət təşkil edirdi. DİM-in zaman-zaman keçirdiyi imtahanlar prosesində ekspertlərin səhlənkarlığı ucbatından bu kimi hallara rast gəlinir. Mən inanıram ki, həmişə biliyi düzgün qiymətləndirən, daim haqlının tərəfində, doğru mövqedə olan DİM həmin test tapşırığını abituriyentlərin xeyrinə götürəcək. Bundan başqa III ixtisas qrupu üzrə 73 saylı açıq tipli test tapşırığı orta ümumtəhsil məktəblərinin 11-ci sinif Azərbaycan tarixi dərsliyində olmayan faktdır. Həmin testdən məntiqi nəticə çıxarmaq olmaz. DİM 25 ildir bəyan edir ki, orta ümumtəhsil dərsliklərində olmayan faktlar sual kitabçalarında öz əksini tapa bilməz. Məsələn, Gürcüstanda Azərbaycan səfirliyinin açılması ilə bağlı fakt kitabda yoxdur. Dərslikdə verilib ki, Azərbaycan qonşu dövlətlərdə səfirliklər açıb, amma ad verilməyib. Bu müqayisə Azərbaycan Xalq Cümhuriyyəti (AXC) ilə aparılıb. AXC-nin hətta Ermənistanda belə səfirliyi var idi, amma müstəqil Azərbaycanın yoxdur. Qonşu dövlət deyiləndə kitabda ad göstərilməyibsə, 17-18 yaşlı şagirdlərə bu tipli test tapşırıqlarının verilməsini qətiyyətlə pisləyirəm. Ümumilikdə hesab edirəm ki, II və III ixtisas qrupu üzrə imtahanda öz əksini tapan bu suallar imtahana sual seçimini edən ekspertlərin diqqətsizliyi və səhlənkarlığı ucbatından test tapşırığında yer alıb. Həmin suallar ulduzla göstərilməli və abituriyentlərin xeyrinə həll olunaraq onlara əlavə bal gətirməlidir.

Xeberle.com