Sovetlər dönəmində hər bir Sumqayıt sakini şəhərimizdə küçələri yuyan maşınlara rast gəlirdi. Lakin hazırda küçələr təmizlənsə də, onların yuyulması o qədər də nəzərə çarpmır. Ötən yazılarımızən birində küçələrin yuyulması ilə bağlı Sumqayıt şəhər Mənzil Kommunal Təsərrüfat Birliyindən verilən açıqlamada bidirilmişdi ki, yollar dəyişdirildiyinə görə, küçələrdə toz-torpaq yoxdur, bu səbəbdən yolların yuyulmasına ehtiyac olmur.

Bəs şəhər sakinləri bu haqda nə düşünürlər? Sumqayıtda küçələrin yuyulmasına ehtiyac varmı?

Sualımıza cavab tapmaq üçün Xeberle.com olaraq şəhər sakinləri arasında virtual soğru keçirdik. Aparılan sorğuya əsasən, məlum oldu ki, şəhər sakinlərinin böyük əksəriyyəti küçələrin yuyulmasının tərəfdarıdır.

Bu səbəbdən də, yenidən Sumqayıt şəhər Mənzil Kommunal Təsərrüfat Birliyinin baş mühəndisi Atəş Məmmədov ilə əlaqə saxladıq. A.Məmmədov bildirdi ki, qranit bardürlü küçələr mütəmadi olaraq yuyulur:

"Hazırda balansımızda 6 ədəd su maşını var. Heydər Əliyev prospekti, Səməd Vurğun küçəsi və s. kimi qranit bardürlü küçələr Təmizlik Departamentinin sözügedən maşınları tərəfindən mütəmadi olaraq yuyulur”.

Elnarə Salamova

Xeberle.com