Xeberle.com portalına ünvanlanan bir şikayətin sorağı ilə yolumuzu Sumqayıtın İnşaatçılar qəsəbəsindən saldıq. Qeyd edək ki, bu qəsəbədə yerli sakinlərlə yanaşı, Ermənistanın işğalı nəticəsində dədə-baba torpaqlarından didərgin düşmüş qaçqınlar da məskunlaşıb. Kimisi yataqxanalarda, kimisi isə emalatxanalarda. Bizi görcək emalatxanada yaşayan Zəngilan rayonundan qaçqın düşmüş Mətanət Məmmədovanın dərdi açıldı. Onların qaldığı emalatxana yaşayış üçün çox əlverişsiz bir yer idi. İçərisi soyuq daş divarlar  Mətanət xanımın hansı durumda yaşamasından aydınca xəbər verirdi.

Mətanət xanım deyir ki, İnşaatçılar qəsəbəsində olan emalatxanada onlarla birgə bir neçə ailə də məskunlaşıb. M.Məmmədova yaşağıdı şəraitdən və imkansızlıqdan şikayətləndi: “ Nə pensiya, nə də sosial yardım ala bilmirəm. Sosial yardım üçün getdim. Mənə dedi ki “6 ayı sənin, 6 ayı mənim”. Mən də razı olmadım.”

Mətanət xanımdan Əmək və Əhalinin Sosial Müdafiəsi Nazirliyinin hansı rayon şöbəsinə müraciət etdiyini soruşsaq da, israrla sualımızı cavabsız qoydu. Güman ki, söhbət Əmək və Əhalinin Sosial Müdafiəsi Nazirliyinin Zəngilan rayon şöbəsindən gedir.

Sözlərinə davam edən M. Məmmədova müraciət etdiyi dövlət qurumunda onunla kobud davrandıqlarını da dedi: “Bütün sənədlərim də əlimdədir. Sonra bir daha getdim. Uşaq da mənimlə idi. Bu dəfə də “Bura uşaq bağçası deyil” deyib məni çölə çıxardılar”.

Qaçqınlıq həyatı yaşayan Mətanət xanım xəstə olduğunu və bu səbəbdən işləyə bilmədiyini də bildirdi: “Özüm də xəstəyəm. Əməliyyat olunmuşam və buna görə də işləyə bilmirəm. Yoldaşım da qul bazarına gedir. Amma nə fayda?!İş də tapa bilmir. Mənə ayda cəmi 15 AZN çörək pulu verirlər. İndi sizdən soruşuram, bu məbləğlə heç dolanmaq olarmı?!” Problemlər məngənəsində boğulan Zəngilan rayon sakini üstəlik sıxıntılarının üzərinə birinin də əlavə olunduğunu ürək ağrısı ilə dilə gətirdi: “Uşağım da xəstədir. Pəncə əyriliyi var. 1000 manata yaxın borcum var. Axı bu uşağın müalicəsi, geyimi, yeməyi var? Bəs mən nə etməliyəm?! Nə yaşayış yerimiz normal deyil, nə həyat tərzimiz normal deyil. Bu yerdə heç it də yaşamaz. Daim evdə iri siçan, siçovullar da olur. Geçə yatanda da qorxaraq yatırıq ki, siçan bir yerimizi dişləyər. Səhər açılanda şükür edirik ki, sağ-salamatıq. Amma biz burda yaşayırıq. Əgər buna yaşamaq demək olarsa... Çox xahiş edirəm, bizə kömək edin. Çünki belə yaşamaq olmur.”

 Biz şikayətçini dinlədik, gerisi qaldı səlahiyyətlilərin insafına. Ümidvarıq ki, aidiyyəti qurumlar acınacaqlı vəziyyətdə yaşayan Mətanət xanımım halına biganə qalmayacaqlar.

Türkan Heydərova, Xeberle.com

P.S. Görünür Səlim Müslümovun nazir işinə yeni başlayarkən yaratdığı "hay-küy"dən bir şey çıxmadı.