Məlumdur ki, Azərbaycanda keçirilən "Məktəblilərarası II robot Olimpiadası”nda "Hardware Control” kateqoriyası üzrə I yerin qalibi olan məktəbli Yasin Quliyev yol pulu səbəbindən Meksikada keçirilən beynəlxalq yarışa qatıla bilməyib. Yasin Quliyev kömək üçün Nəqliyyat, Rabitə və Yüksək Texnologiyalar Nazirliyinə (NRYTN) ərizə ilə müraciət edib. Nazir müavini Elmir Vəlizadə cavab olaraq bildirib ki, tədbirdə iştirakla bağlı maliyyə vəsaitinin ayrılması nazirliyin imkanı xaricindədir.

Xeberle.com bildirir ki,məsələ ilə bağlı Bizimyol.info-ya danışan Azərbaycan İnternet Forumunun prezidenti Osman Gündüz bunun xoşagələn hal olmadığını qeyd etdi:
" Yaxşı olardı ki, bu sahə üzrə tanınan gənclərin, şagirdlərin belə tərbirlərdə iştirakına nail olaq. Bu tip tədbirlər az olur və dünyanın ən yaxşıları oraya qoşulur. Ola bilər ki, nazirliyin təyinatında belə bir vəsait nəzərdə tutulmasın. Amma sahə ilə əlaqəli qurumlar NRYTN və Təhsil Nazirliyidir. Bu iki qurum əgər təyinatı üzrə vəsait tapa bilmirsə, heç olmazsa istiqamət verə və özünün adından müxtəlif fondlara müraciət göndərə bilərdi. Ya da həmin şagirdi dəvət edərək ona tövsiyələr verərdi. Hesab edirəm ki, hər iki nazirlik gənclərimizin, şagirdlərin bu tip tədbirlərdə iştirakı üçün əlavə imkanlar tapmalıdır. Məsələn, İnformasiya Texnologiyaları (İT) ilə bağlı şirkətlərə müraciət etmək olar və onların fondları yaradıla bilər. Hansı ki, əvvəllər nazirlikdə belə bir təcrübə də olub. Mən düşünürəm ki, hər iki qurum birlikdə bunu edə bilər. Fondlardan gənclərimizin oxumağa, olimpiadalara, beynəlxalq yarışlara göndərilməsi, təhsil xərclərinin qarşılanması üçün faydalanmaq olardı. Sadəcə bir məktub yazmaq və belə bir imkanın olmadığını göstərmək işin rəsmi tərəfidir. Amma mən hesab edirəm ki, yardımçı olmaq üçün əlavə imkanlar sərf etmək lazım idi. Bu, xoşagələn hal deyil”.