Bakıda "Azərbaycan Robotika və Avtomastlaşdırma Cəmiyyəti" (Azerbaijan Robotics and Automation Society - ARAS) İctimai Birliyinin və Avstriyanın Vyana Texnologiya Universitetinin birgə təşkilatçılığı ilə Ümumdünya Avtomatik İdarəetmə Sistemləri Təşkilatı dəstəkli beynəlxalq konfrans keçirilir.
Xeberle.com-un Metbuat.az-a istinadən verdiyi məlumatına görə tədbir Texnologiya, Mədəniyyət və Beynəlxalq sabitlik üzrə 18-ci İFAC beynəlxalq konfransı - TECİS (Technology, Culture and İnternational Stability) adlanır. TECİS 2018 beynəlxalq konfransının açılışında İFAC-ın Azərbaycanda tərəfdaşı qismində çıxış edən Robotika və Avtomastlaşdırma Cəmiyyəti" İctimai Birliyinin və konfransın təşkilat komitəsinin sədri, fəlsəfə doktoru Bahadur İbrahimov çıxış edib. O, 12 sentyabr 1957-ci ildə Parisdə təsis edilən, 1978-ci ildən Avstriyanın Lüksemburq şəhərində fəaliyyətini davam etdirən İFAC-ın 49 ölkədən avtomatlaşdırılmış idarətmə və mühəndislik təşkilatını birləşdiyini bildirib. B.İbrahimov İFAC-ın strukturundakı ilk komitələrdən biri olan TECİS texniki komitəsinin Bakıdakı tədbirdə eyni zamanda 35 illik yubileyini qeyd etməsini xüsusi vurğulayıb. O, İFAC-ın Bakıda ilk və son toplantısının 1980-ci ilin 2-6 aprel tarixlərində ümumilli lider Heydər Əliyevin dəstəyilə baş tutduğunu deyərək, 38 ildən sonra yenidən keçirilən bu nüfuzlu beynəlxalq konfransda beynəlxalq rəyçilər tərəfindən seçilmis 170 məqalənin 9 sessiyada təqdim ediləcəyini bildirib.
B.İbrahimov Metbuat.az-açıqlamasında bildirib ki, konfransın əsas məqdəsi robotlaşdırma, avtomatlaşdırma, mexatronika üçün intellekt kimi günümüzün əsas mövzularında fikir mübadiləsi aparmaqdır:
"370-dən çox həmmüəllif tərəfindən göndərilmiş məqalələrin əksəriyyəti robotika, avtomatlaşdırma, humanoid robotlar, mexatronika kimi müasir dövr üçün əhəmiyyətli sayılan sahələri əhatə edir. Göndərilən məqalələrin müəllifləri 37-dən çox fərqli ölkəni təmsil edir. Azərbaycanlı alimlər konfransa 50-yə yaxın məqalə göndəriblər".
Tədbirdə çıxış edən Nəqliyyat, rabitə və yüksək texnologiyalar naziri Ramin Quluzadə bildirib ki, belə nüfuzlu tədbirin Azərbaycanda keçirilməsi ölkə ictimaiyyəti üçün də mühüm hadisədir:
"Elm və texnologiya hər bir ölkənin sosial-iqtisasi inkişafında aparıcı rol oynayır. Bu gün dünyada davamlı və dayanıqlı inkişafa bağlı ən qlobal təşəbbüslər, İKT, yüksək texnologiyanın tətbiqi ilə həyata keçirilir. Artıq dövlətlərin iqtisadi üstünlüyü də məhz elm və texnologiyalara yiyələnərək onları mənimsəmək gücünə hesablanır. Ölkəmizdə elmin, təhsilin və texnologiyanın inkişafı dövlət siyasətinin prioritet istiqamətlərindəndir. Hətta son illərdə bu istiqamətdə ciddi addımlar atılıb".
Nazir bildirib ki, Bakıda keçirilən beynəlxalq konfrans ölkələrimiz arasında elmi əlaqələrin genişləndirilməsində qarşılıqlı fayda barədə fikir mübadiləsi aparmağa, əməkdaşlıq istiqamətlərini müəyyənləşdirməyə və avtomatik idarəetmə sahəsində yenilikləri bölüşdürməyə imkan verəcək.
Tədbirdə çıxış edən Ümumdünya Avtomatik İdarətmə Sistemləri Təşkilatı prezidenti və Almaniya Elm Fondunun vitse-prezidenti Frank Allgöver təşkilat üçün Azərbaycanın region üçün önəmindən, bölgədə həyata keçirilən əhəmiyyətli layihələrin təşəbbüskarı olmasından və bu ölkənin dünya elminə verdiyi töhfələrdən danışıb.
Metbuat.az-a açıqlama verən F.Allgöver bildirib ki, bu konfrans bizə imkan verəcək ki, avtomatlaşdırma nəzarət sahəsində olan beynəxalq ictimaiyyətlə əlaqələr yarada bilək. Bu tədbir eyni zamanda bütün tərəflər üçün faydalı olacaq. Konfrans plenar sessiyalarla fəaliyyətini davam etdirir.
Xəbərdən istifadə edərkən istinad etmək vacibdir.
