Əgər həmin yerdə obyekt tikilərsə, onda şəhər rəhbərliyi öz mövqeyindən geri çəkilməli olacaq

Sumqayıtda növbəti dəfə yaşıllıqlara qənim kəsilib, ağaclar kəsilib. Hadisə Sumqayıt şəhər Səməd Vurğun adına Mərkəzi Kitabxanasının qarşısında həyata keçirilib. Şahidlərin “Xeberle.com”-a verdiyi məluamata görə, günün günorta çağı naməlum şəxslər 3 ağacı baltalayaraq maşına qoyub apardılar. Şahidlər əlavə etdilər ki, onlarda böyük əminlik var, ağaclar kəsilən ərazidə obyekt inşa ediləcək. Üstəlik, işbazlar ağacları kəsməklə yanaşı, təhlükə də törədiblər. Kəsilən ağaclar yaxınlıqda olan işıq dirəyinin üzərinə aşaraq dirəyi tamamən istifadəsiz hala gətirib. Xoşbəxtlikdən yaxınlıqdan keçən olmayıb.

 Yəqin ki, işıq dirəyinin üzərinə ağac aşıran heç orada piyadanın olmasına da fikir verməzdi.
Böyük ehtimalla ağacları obyekt tikmək üçün kəsiblər. İndi, maraqlıdır, görəsən bu tikintiyə icazə veriləcəkmi? Bəlkə də... Amma əlimizdə faktlar var, ən azı bu fotolar...

Güman edirik, əlaqədar qurumlar bu məsələni diqqətdə saxlayacaq - ilk növbədə Sumqayıt şəhər İcra Hakimiyyəti - və orada hansısa bir obyektin tikintisinə icazə verməyəcək. Əgər elə olarsa, onda şəhər rəhbərliyi öz mövqeyindən geri çəkilməli olacaq. Çünki bir neçə ay bundan öncə Sumqayıt şəhər İcra Hakimiyyəti başçısının müavini Elgin Həbibullayevin bu problemlə bağlı videoçıxışı olmuşdu. O qeyd etmişdi ki, Sumqayıtda ağackəsənlərə qarşı ciddi mübarizə aparılır. Əlavə etmişdi ki, belə hallar olur ki, bəzi işbazlar gedib icra hakimiyyətinin adından şəhərin müxtəlif yerlərində ağacları kəsirlər, artıq üstündən 5-6 ay keçəndən sonra İcra Hakimiyyətinə həmin ərazidə obyekt tikintisi ilə bağlı müraciət edirlər: “Mən belə insanlara üzümü tutub deyirəm, onlar bilsinlər, heç bir ağac kəsilən ərazidə heç bir obyekt tikintisindən söhbət gedə bilməz. Bu İcra Hakimiyyətinin qəti mövqeyidir və buna heç vaxt icazə verilməyəcək. Belə insanlar ən ciddi cəzalarını alacaqlar”, - deyə müavin söyləyib.

Xeberle.com
Fotolar Ömürtay Şükürlünündür

P. S. Qəribədir ki, bir çox ölkələrdə geniş vüsət almasına baxmayaraq, bizdə ağacların bir ərazidən digərinə köçürülməsi, bu mümkün olmadıqda isə onların yerinə yeni tinglərin əkilməsi (tutalım, 1 kəsilən ağacın əvəzinə 10 ting) çox nadir hallarda baş verə bilər. Cənablar, sizi anlayıram, 1 ağacı kəsmək daha asandır, nəinki onu digər bir yerə köçürmək, yaxud əvəzinə 10 ting əkmək. Unutmayaq, bu şəhər bizimdir və havasını hər birimiz, hər birimizin ailəsi, uşaqları udur. Ekoloji balansın qorunması hər birimizin borcu olmalıdır. Ən azı ona görə ki, bizdən sonra gələn nəsillər bizə lənət oxumasın!


Bu da Sumqayıt Şəhər İcra Hakimiyyəti başçısının müavini Elgin Həbibullayevin məlum çıxışı: