Xəbər verdiyimiz kimi, Sumqayıtda daha bir ərazidə ağacların kütləvi şəkildə kəsilməsi aşkarlanıb. Bu kimi hadisələr dəfələrlə mediada işıqlandırılsa da, hələki öz həllini tapmır. Məsələ ilə əlaqədar ekologiya mütəxəssisi Vüsal İbrahimli öz feysbuk səhifəsində tənqidi status paylaşıb. Birlik.az saytı həmin statusu təqdim edir:

 "Şəxsi maraqlarını ictimai maraqlardan üstün tutan şəxs elə ictimaiyyətə düşməndir. Bir nəfər özünün ticarət işlərini genişləndirmək üçün əlinə baltanı alıb 5-10 ağacı şil-küt eliyib qoyur yerə. A kişi, sən kimsən? Sənə kim ixtiyar verib ki, yaş ağaclara belə soyqırım edirsən. Sən bilirsən ki, bu ağacların böyüyüb bu vəziyyətə gəlməsi üçün nə qədər insan əməyi və nə qədər zaman lazımdır. Abşeron torpağında ağac əmələ gətirmək elə də asan iş deyil. Bəlkə, elə bilirsiniz ki, ağac ancaq oksigenin istehsalı üçün lazımdır, bu küçədə olmasın, o küçədə olsun. Sovet dövründə dəniz kənarına əkilmiş ağacların nəyə qulluq etdiyini bilirsən? Yox bilmirsən, əgər bilsəydin, belə etməzdin.

 Dəniz kənarına əkilmiş ağaclar küləyin qarşısını almaq və zavodlardan qalxan artıq qazları udmaq üçündür. Bil ki, ağaclar oksigen istehsalından başqa, avtomobillərin istismarı zamanı əmələ gələn qazları və tozları udmaq üçün, tarlaqoruyucu kimi, sürüşmənin qarşısını almaq üçün, küləklərin qarşısını almaq üçün və s. üçündür. Yazmaqla qurtarmaz. İnsan həyatında önəmli yer tutur bu ağaclar. Gəlin bir olaq, ağaclara qarşı səhv addım atanlara qarşı bir olub düz addım ataq".