Sumqayıt şəhər Məşğulluq Mərkəzi "Azərbaycan Respublikasının Məşğulluq Strategiyasının (2011-2015-ci illər) həyata keçirilməsində sosial tərəfdaşların rolu” mövzusunda "dəyirmi masa” keçirib. Şəhərin Tarix Muzeyində keçirilən tədbirdə Sumqayıtda fəaliyyət göstərən 30-a qədər iri şirkət və müəssisələrin, eləcə də həmkarlar təşkilatlarının nümayəndələri iştirak ediblər. Şəhər Məşğulluq Mərkəzinin rəhbəri İlham Hüseynov AzərTAc-a bildirib ki, "dəyirmi masa” formatında keçən müzakirələr zamanı əsas diqqət məşğulluğun təmin olunması sahəsində müvafiq məlumat və hesabatların məşğulluq xidməti orqanlarına təqdim edilməsinə, ərazi məşğulluq proqramının icrasına, işaxtaran və işsiz vətəndaşların sosial müdafiəsi istiqamətində həyata keçirilən məşğulluq tədbirlərinə yönəldilib. Həmçinin sosial müdafiəyə xüsusi ehtiyacı olan və işə düzəlməkdə çətinlik çəkən vətəndaşlar üçün kvota yerlərinin müəyyənləşdirilməsi, onların işlə təmin edilməsi və digər məşğulluq tədbirləri də müzakirə olunub. İ.Hüseynov deyib ki, "dəyirmi masa” iştirakçıları bu tədbirlərin sosial tərəfdaşlıq prinsipi əsasında həyata keçirilməsinin vacib olduğunu qeyd ediblər. Bu məqsədlə Məşğulluq Mərkəzi ilə sosial tərəfdaşlar arasında sıx əlaqə yaratmaq, əmək bazarının təhlilində işəgötürənlərin iştirakını təmin etmək qərara alınıb.