Sumqayıt Dövlət Universitetində Prezident yanında Bilik Fondu ilə görüş keçirilib.
Fondun İnformasiya Təminatı sektorundan AZADİNFORM-a verilən məlumata görə, Bilik Fondunun icraçı direktoru Oktay Səmədov, qurumun əməkdaşları SDU-nun professor-müəllim və tələbə heyəti ilə görüşüblər.
Tədbirdə Sumqayıt şəhər təhsil şöbəsinin müdiri Vaqif Ələkbərov SDU-nun prorektoru Nizami Nəcəfov, müəllim və tələbə kollektivi, Sumqayıt şəhərindəki orta məktəblərin direktorları, Bilik Fondunun Sumqayıt üzrə nümayəndəsi iştirak edib.
SDU-nun rektoru Elxan Hüseynov Bilik Fondunun əməkdaşlarını rəhbərlik etdiyi ali təhsil ocağında qarşılamaqdan məmnun olduğunu deyib, cəmiyyətin inkişafında Fondun həyata keçirdiyi layihələrin müstəsna əhəmiyyətindən danışıb.
İcraçı direktor O. Səmədov Bilik Fondunun fəaliyyəti, həyata keçirdiyi layihələr barədə ətraflı məlumat verib. Fondun məqsədinin əhalini maarifləndirmək olduğunu xatırladan icraçı direktor layihələrin icrasında təhsil işçilərini yaxından iştirak etməyə çağırıb.
SDU-nun prorektoru N. Nəcəfov universitetin Bilik Fondunun layihələrində məmnuniyyətlə iştirak etməyə hazır olduğunu bildirib. Sumqayıt şəhər təhsil şöbəsinin müdiri V. Ələkbərov qeyd edib ki, Fondla qurulan əlaqələr təhsilin inkişafına təkan verəcək.