Son illər gənclər arasında diplomatik fəaliyyətə maraq artıb
Ali məktəblərə qəbul imtahanları zamanı beynəlxalq münasibətlər və digər bu profildən olan ixtisaslara keçid ballarının artması bu xüsusda təsadüfi sayıla bilməz.
Diplomatik fəaliyyətdə olan gənclər arasında məmur övladları da az deyil.
Editor.az-ın əməkdaşı müxtəlif dövlətlərdə Azərbaycanı təmsil edən, diplomatik korpuslarda çalışan məmur övladları ilə bağlı araşdırma aparıb. Məlum olub ki, bir sıra dövlətlərdə Azərbaycan səfirliklərinə məhz məmur, xüsusən də nazir övladları rəhbərlik edir.
Baş nazirin I müavini Yaqub Eyyubovun oğlu Emin Eyyubov Azərbaycanın Avropa Birliyi yanında diplomatik missiyasına rəhbərlik edir.
Baş nazirin digər müavini Elçin Əfəndiyevin qızı Günay Əfəndiyeva YUNESKO üzrə Azərbaycan Milli Komissiyasının birinci katibidir.
Azərbaycanın Almaniyadakı səfiri Pərviz Şahbazov da məmur oğludur. Onun atası Azərbaycan Respublikası Prezidenti Administrasiyasının İşlər idarəsi müdirinin birinci müavini Oqtay Şahbazovdur.
Azərbaycan Yazıçılar Birliyinin sədri Anar Rzayevin oğlu Tural Rzayev Azərbaycanın Küveytdəki səfiridir.
Fövqəladə Hallar naziri Kəmaləddin Heydərov, Nəqliyyat naziri Ziya Məmmədov və Azərbaycan Dövlət Neft Şirkətinin prezidenti Rövnəq Abdullayevin övladları diplomatik korpuslarda çalışmasalar da, diaspor fəaliyyəti ilə ökəmizi xaricdə təmsil edirlər.
Belə ki, Kəmaləddin Heydərovun oğlu Taleh Heydərov Avropa-Azərbaycan Cəmiyyətinin, Ziya Məmmədovun oğlu Anar Məmmədov Amerika-Azərbaycan Cəmiyyətinin, Rövnəq Abdullayevin oğlu Rəşad Abdullayev isə Türkiyədə "AzerDar” təşkilatının sədridir.
Xəbərdən istifadə edərkən istinad etmək vacibdir.
