Satıcılar xəbərin ciddiliyinə inanmır, ancaq...

Paytaxt sakinlərinin ucuzluğuna görə daha çox üz tutduğu "Vosmoy” kimi tanınan "8-ci kilometr bazarı”nın satılması məsələsi yenidən gündəmə gəlib. Bu dəfə səbəb daha ciddi görünür.

Belə ki, Əmlak Məsələləri Dövlət Komitəsi (ƏMDK) bazarın səhmlərinin 99,89 faizinin satılması üzrə investisiya müsabiqəsi elan edib. 514 min 981 ədəd səhmin satışı üzrə müsabiqəyə həm yerli, həm də xarici investorlar qatıla bilər. Müsabiqənin qalibi səhmlərə görə dövlət büdcəsinə ən azı 312 min manat köçürməlidir. 

Komitədən verilən məlumatda bildirilir ki, qaliblə səhmlərin alqı-satqısı haqqında müqavilə müsabiqənin nəticələrinin təsdiq olunduğu tarixdən etibarən 30 gündən gec olmayaraq imzalanmalıdır. Müsabiqə təklifləri 2015-ci il yanvarın 14-dək qəbul ediləcək və yanvarın 16-da qiymətləndiriləcək. 

Biz də satıcıların və bazarın daimi alıcılarının bu məsləyə münasibətini öyrənmək üçün sözügedən bazara üz tutduq. Bazarda həmişə olduğu kimi, tünlük idi. Satıcı ilə mübahisə edib hansısa malın qiymətinə aşağı saldırmağa çalışan kim, "gəl ay müştəri, ən ucuz mallar burada” deyib müştəri çağıran kim...

Müştəri səsləyən satıcılardan birinə yaxınlaşıb bazarın satılacağı haqdakı söhbətlərdən agah olub-olmadığını soruşduq. Adının Kamal Quliyevolduğunu deyən satıcı 5 ildir ki, bazarın satılacağı ilə bağlı söhbətlərin olduğunu dedi: "Bazar satılan deyil. Hər il bu söhbəti ortaya atıb bizi panikaya salırlar. Biz işimizdəyik və boş-boş söhbətlərə inanmırıq”.

Paltar satıcısı Elvin Mehtiyev də bazar haqda gəzən söhbətlərdən xəbərsiz idi: "Kim deyir satılır? Bu şayiədən başqa bir şey deyil. Bir dəfə də şayiə yayıldı ki, bazar Kürdəxanı tərəfə köçürələcək. Mən də yavaş-yavaş yığışırdım ki, köçəcəyik. Amma gördüyünüz kimi, hələ də burdayıq. Ona görə deyirəm ki, belə söhbətlərə inanmıram. Görsək ki, bizi uyğunsuz uzaq bir yerə köçürürlər onda yenə aksiya edərik. Hamımız uşaqlarımıza çörəyi buradan aparırıq”. 

Satıcı Abbas Ağayev da bazarın satılması ilə bağlı xəbəri ciddiyə almadığını deyir: "Bazarın satılıb-satılmamasının mənə heç bir dəxili yoxdur. Mən burada gündəlik yer haqqını verib malımı satıram. Satırlar özləri bilsinlər. Bura olmasın, başqa yer olsun. Bir yer götürüb malımı satacam. Amma illərdir ki, bazarı gah ”satırıq" deyirlər, gah da "köçürürük”. Hər il çıxan bu şayiələr gec-tez gerçək olacaq. Kim alır, kim satır Allah xeyir versin. Amma bizim çörəyimizə mane olmasınlar".

Satıcı Arif isə bazarın satılmasının qəti əleyhinə olduğunu dedi: "Biz bura öyrəşmişik. Müştərilərimiz buradadır. Uzağa köçürsələr müştərilərimizi itirəcəyik. Həm də bura yol qırağıdır, hamı bu bazara üz tutur”.

Bir neçə alıcının da fikrini aldıq. Alıcılardan bəziləri bazarın daha səliqəli bir yerə köçürülməsini istəsə də, bunun əksini arzulayanlar da az deyildi. Sevda Paşayeva deyir ki, bazarı uzağa köçürsələr onun üçün çətin olacaq: "Mənim evim bura yaxındı. Ona görə də buradan bazarlıq etmək mənə sərf edir. Həm də qiymətlər ucuzdur. Bu bazar başqa yerə köçsə, qiymətlər bəlkə də bu qədər ucuz olmayacaq”.

Digər alıcı Telman Süleymanov isə bazarda antisanitariyanın baş alıb getdiyini, buna görə də bazarın köçürülməsinin tərəfdarı olduğunu bildirdi: "Mən bu bazardan yalnız meyvə-tərəvəz alıram. Ət, toyuq kimi qidaları almıram. Çünki necə gəldi, antisanitariya şəraitində satırlar. Bir tərəfdə zibillikdir, o biri tərəfdə də ərzaq. Təmiz, səliqəli bir yerə köçürsələr yaxşı olar”. (milli.az)