Xeberle.com-un məlumatına görə, həftə sonları tətbiq edilən sərt karantin qaydalarına görə yarmarkanın keçirilməsi günündə dəyişiklik edilib. Şənbə və bazar günləri təşkil edilən kənd təsərrüfatı yarmarkası verilən qərara əsasən, bu həftədən Çərşənbə və Cümə axşamı günləri fəaliyyət göstərəcək. Yarmarka ötən həftə sərt karantin rejiminə görə fəaliyyət göstərmədiyindən bu həftə daha 2 gün əlavə olaraq - Cümə və Şənbə günü də şəhər sakinlərinin ixtiyarında olacaq.

Yarmarkada xüsusi karantin rejiminin tələblərinə, eləcə də alıcı və satıcıların tibbi maskadan istifadə olunmasına ciddi nəzarət həyata keçiriləcək.

Qeyd edək ki, 2020-ci il 14 iyun saat 00:00-dan 16 iyun saat 06:00-dək Bakı, Gəncə, Lənkəran və Sumqayıt şəhərlərinin, Abşeron, Yevlax, İsmayıllı, Kürdəmir və Salyan rayonlarının ərazisində sərtləşdirilmiş karantin rejimi tətbiq ediləcək.

Həmin müddət ərzində qeyd olunan şəhər və rayonların ərazilərində bütün iş, xidmət və ticarət sahələri üzrə fəaliyyət, eyni zamanda ictimai nəqliyyatın və avtomobillərin hərəkəti dayandırılır (xüsusi təyinatlı, qəza-bərpa, təcili tibbi yardım avtomobillərinin və fəaliyyətinə icazə verilən orqanların (qurumların) və təşkilatların xidməti, həmçinin onların əməkdaşlarına məxsus şəxsi avtomobillərin, eyni zamanda yaxın qohumlarının dəfnində iştirakla əlaqədar vətəndaşların şəxsi avtomobillərinin hərəkəti istisna olmaqla) və əhalinin yaşayış yerlərini və ya olduğu yerləri tərk etməsi qadağan edilir.

Xədicə Səxavətqızı

Xeberle.com