Həmin gün eyni zamanda ümummili lider Heydər Əliyevin xatirəsinə həsr olunmuş anım mərasimi də keçirilib


Azərbaycan Respublikası Prezidenti Yanında Gənclər Fondunun maliyyə dəstəyi ilə Gənc Politoloqlar Mərkəzinin (GPM) həyata keçirdiyi "Gənc tədqiqatçıların elmi potensillarının artırılması” adlı layihəsi çərçivəsində təşkilatın növbəti seminarı 11 dekabr 2014-cü ildə Odlar Yurdu Universitetində keçirildi.

Xeberle.com məlumat verir ki, saat 10:00-da Odlar Yurdu Universitetinin kiçik akt zalında öz işinə başlayan seminarın mövzusu "Azərbaycanda elm və təhsilin inkişafına dövlət qayğısı” idi. Əvvəlcə, seminar iştirakçıları qarşısında Azərbaycan Respublikası Kənd Təsərrüffatı Nazirliyinin idarə rəisi vəzifəsində işləmiş, Azərbaycan Respublikası Prezidenti yanında Dövlət İdarəçilik Akademiyasının məzunu, gənc elmi tədqiqatçı Rəşid Abbasov Azərbaycanda elm və təhsilin inkişafına dövlət qayğısından, ümummili lider Heydər Əliyevin Azərbaycan Respublikasında elm və təhsilin inkişafında rolundan, həmçinin, kənd təsərrüfatı elminin inkişafında son dövrlər əldə edilən nailiyyətlərdən bəhs etdi. Natiq bir çox faktlar əsasında Azərbaycanda elm və təhsilin inkişafında əldə edilən son uğurları, həmçinin bu sahədə olan perspektivləri qeyd etdi və gənc tədqiqatçılara həmin sahə üzrə elmi tədqiqata həvəsləndirilməsi üçün müxtəlif tövsiyələr verdi.

Qeyd edək ki, həmin gün Gənc Politoloqlar Mərkəzi, Odlar Yurdu Universiteti və "Mərd Petrol” şirkəti birlikdə ümummili lider Heydər Əliyevin xatirəsinə həsr olunmuş anım mərasimi keçirdi. Seminar iştirakçıları kollektiv qaydada həmin mərasimə qatıldılar.

Anım mərasimini giriş sözü ilə açan Odlar Yurdu Universitetinin rektoru, millət vəkili, professor Əhməd Vəliyev ulu öndərin həyatı və xalqımız qarşısında misilsiz xidmətləri haqqında geniş çıxış etdi. O bildirdi ki, ümummilli lider Heydər Əliyevin Azərbaycan xalqı qarşısında ən böyük xidmətlərindən biri onun müstəqil Azərbaycanı qurub yaratması olmuşdur. Əhməd Vəliyev fikrinə davam edərək söylədi: "Heydər Əliyevsiz Azərbaycan, Azərbaycansız isə Heydər Əliyevi təsəvvür etmək mümkün deyildir".

Professor Əhməd Vəliyev 1995-ci ildə Odlar Yurdu Universitetinin ulu öndərimizin təşəbbüsü ilə yarandığını qeyd etdi və dahi rəhbərin büstünün respublikada ilk dəfə olaraq məhz Odlar Yurdu Universitetində qoyulduğunu, həmçinin Milli Məclisin sabiq spikeri, mərhum Murtuz Ələsgərovun iştirakı ilə universitetdə təntənəli açılışının olduğunu vurğuladı. O, daha sonra xüsusilə vurğuladı: «Odlar Yurdu Universiteti ulu öndərin xatirəsini həmişə yad edir və biz onun tövsiyələri əsasında universitetdə öz işimizi qururuq».
Professor Əhməd Vəliyev qeyd edib ki, ulu öndər haqqında yazdığımız "Bəsirət ünvanı" adlı kitabda hər şey dəqiqliyi ilə, faktlara əsaslanaraq işıq üzü görüb. Kitabda ulu öndər Heydər Əliyevin Azərbaycana rəhbərlik etdiyi 1969-cu ildən başlayaraq sosial həyatın, mədəniyyətin, iqtisadiyyatın, təhsilin inkişafına göstərdiyi qayğı ciddi faktlarla qeyd olunur və Azərbaycanda bütün sahələrin inkişaf etdirilməsi və uğurlar qazanması kitabımızda əsas yer tutur. Ulu öndər Heydər Əliyev kadrların seçilməsində də öz tövsiyələrini hər zaman bildirmiş, yaradıcı insanlara, təhsildə uğur qazananlara, əsasən də, gənclərə diqqət və qayğı göstərirdi. Heç təsadüfü deyil ki, Heydər Əliyev özündən sonra onun irsini ləyaqətlə davam etdirə biləcək siyasi lideri də əvvəlcədən müəyyənləşdirmişdi. Azərbaycan Respublikasının Prezidenti İlham Əliyev tərəfindən ulu öndərin siyasi kursunun uğurla davam etdirməsi nəticəsində biz bugünkü müasir Azərbaycanı qazanmışıq. Natiq vurğuladı ki, Heydər Əliyev İlham Əliyevi yalnız bir oğul kimi yox, Azərbaycanı hərtərəfli inkişaf etdirmək, tariximizi, mədəniyyətimizi, milli dəyərlərimizi qorumaq və yaşatmaq üçün onu bu posta layiq görmüşdür. Eyni zamanda, Azərbaycan Prezidenti İlham Əliyevin mahir diplomat bacarığını qeyd edən natiq ölkəmizin beynəlxalq aləmdə əldə etdiyi uğurlardan da danışmışdır. O, fikrini davam etdirərək qeyd etmişdir ki, bu gün də cənab İlham Əliyev ümummilli liderin layiqli davamçısı kimi Azərbaycan Respublikasının müstəqilliyini qoruyub saxlanılması, respublikamızın bütün dünyaya tanıdılması istiqamətində səmərəli fəaliyyət göstərir. Həmçinin, İlham Əliyev cənabları ölkəmizin inkişafı ilə əlaqədar mühüm əhəmiyyətli sərəncamlar və fərmanlar verir. Biz də onun imzaladığı sərəncamlara əsaslanaraq universitetimizdə gənclərin layiqli vətənpərvər kimi yetişməsi üçün əzmlə çalışırıq. İlham Əliyev Azərbaycan vətəndaşlarının dinc şəraitdə, əmin-amanlıq içərisində rahat yaşamaları üçün günü-gündən dövlətimizi inkişaf etdirir. Professor ölkə başçısının elm və təhsilin inkişafına göstərdiyi qayğıdan və xüsusilə gənclər siyasətindən geniş bəhs etdi.
Sonda professor Əhməd Vəliyev çıxışına belə yekun vurdu: "XX əsrdə Azərbaycanda Heydər Əliyev kimi siyasətçi, fenomenal yaddaşlı, dünyada tanınan bir lider yetişdi. Ona görə də Heydər Əliyev cismən bizdən ayrılsa da, o, həmişə bizimlədir, bizim qəlbimizdədir. Biz alimlər və tələbələr ulu öndər Heydər Əliyevlə həmişə fəxr etmişik və bundan sonra da onun tövsiyələrini layiqincə yerinə yetirməyə hazırıq".

Sonra çıxış üçün söz türkiyəli iş adamı, "Mərd petrol” şirkətinin prezidenti, anım mərasiminin təşkilatçılarından biri olan Ərcan Turana verildi. O bildirdi ki, Azərbaycan və Türkiyə vətəndaşlarının 70 ildən sonra bir-birinə qovuşmasında ulu öndər Heydər Əliyevin müstəsna xidmətləri vardır. "Bir millət, iki dövlət” deyərək Heydər Əliyev Azərbaycan və türk xalqlarının hərtərəfli inkişafına geniş üfiqlər açdı: «Mən Azərbaycana 1995-ci ildən gəlmişəm və burada işbirliyi qurmuşam. Mənə və digər türk iş adamlarına burda çox gözəl şərait yaratdığına görə Heydər Əliyevə minnətdaram. Bu gün də cənab İlham Əliyev xalqlarımızın birliyi uğrunda ləyaqətlə iş aparır. Ölkələrimizin dövlət başçılarının prezident seçiləndən sonra ilk rəsmi səfərini məhz Türkiyə və Azərbaycana etmələri bizim qardaşlığımızın möhkəm təməl üzərində qurulmasından xəbər verir. Əsası Heydər Əliyev və Mustafa Kamal Atatürk tərəfindən qoyulan siyasətin bu gün də uğurla davam olunmasına görə, dili bir, dini bir, mədəniyyəti bir olan xalqlarımız bu böyük şəxsiyyətlərə həmişə minnətdardırlar. Bu şəxsiyyətlər - həm Atatürk, həm də Heydər Əliyev öz xalqı üçün nələri etmədilər?! Onlar hər şeydən əvvəl xalqlarımıza azadlıq bəxş etdilər. Çıxışçı nitqində vurğuladı ki, ulu öndər Heydər Əliyev dünyada tanınan şəxsiyyət, əvəzolunmaz siyasətçi və uzaqgörən dövlət xadimi idi. Biz türk xalqlarının nümayəndəsi olaraq həmişə Heydər Əliyevi anacaq və qəlbimizdə əbədi olaraq yaşadacağıq».

Tədbirdə daha sonra çıxış üçün söz Azərbaycan Respublikası Prezidenti Administrasiyasının İctimai-siyasi məsələlər şöbəsinin sektor müdiri, Yeni Azərbaycan Partiyası (YAP) Siyasi Şurasının üzvü, siyasi elmlər üzrə fəlsəfə doktoru Qafar Əliyevə verildi. O, çıxışında bildirdi ki, ulu öndər Heydər Əliyev müasir Azərbaycanın banisi, xilaskarı və qurucusudur. "Müstəqil Azərbaycanın banisi dedikdə biz bunu nəzərdə tuturuq ki, Heydər Əliyev yeni müstəqil dövlətin yaranmasının ideya-siyasi və nəzəri fəlsəfi konsepsiyasını hələ Sovetlər dövründə Azərbaycan Sovet Sosialist Respublikasına rəhbərlik edərkən müəyyən etmişdi. Əslində, Azərbaycanın siyasi, iqtisadi və mənəvi müstəqilliyinin bünövrəsi məhz ötən əsrin 70-80-ci illərində ulu öndərin respublikamıza rəhbərliyi dövründə qoyulmuşdur. Məlumdur ki, keçmiş SSRİ ərazisində 1988-ci ildən sonra baş verən proseslər, o cümlədən Dağlıq Qarabağ probleminin baş qaldırması ilə əlaqədar yaranmış Ermənistan Azərbaycan konflikti nəticəsində Azərbaycan Respublikası öz torpaqlarının 20 faizdən çox hissəsini itirdi. Əhalimizin beşdə bir hissəsi, yəni 1 milyondan çox vətəndaşımız qaçqın və məcburi köçkün halına düşdü. Əgər xalqın təkidli tələbi ilə Heydər Əliyev yenidən hakimiyyətə qayıtmasaydı, Azərbaycan şübhəsiz ki, dövlət müstəqilliyini itirəcək və müxtəlif əyalətlərə parçalanacaqdı. Heydər Əliyevin hakimiyyətə qayıdışı və 1994-cü ilin mayında cəbhədə atəşkəsin elan edilməsi, daha sonra 1994-cü ilin sentyabrın 20-də "Əsrin müqaviləsinin imzalanması ilə Azərbaycan parçalanmaqdan və öz dövlət müstəqilliyini itirməkdən xilas oldu", - deyə Qafar Əliyev söylədi. Daha sonra fikrinə davam edərək bildirdi ki, Azərbaycan neft və qaz ehtiyatları və digər təbii sərvətlərlə zəngin olan bir ölkədir. Əgər Heydər Əliyev yenidən hakimiyyət sükanı başına qayıtmasaydı, ölkəmiz ona göz dikən maraqlı xarici dövlətlərin "sayəsində" bugünkü Suriyanın, İraqın, Əfqanıstanın və digər bu kimi dövlətlərin aqibətini yaşayacaqdı. Məhz buna görə də Heydər Əliyev müasir Azərbaycanın xilaskarıdır. Ümummili liderimiz həm də bugünkü müasir dünyada sürətlə inkişaf edən və regionun liderinə çevrilən bir dövlətin memarı və qurucusudur. Ulu öndərimiz tərəfindən müəyyən olunmuş düzgün siyasi kurs ölkəmizi qısa tarixi zaman kəsiyində misli-bərabəri olmayan bir inkişaf yoluna gətirib çıxardı.
Çıxışçı ümummilli lider Heydər Əliyevin siyasi kursunun ən layiqli davamçısı olan Azərbaycan Respublikasının Prezidenti İlham Əliyev tərəfindən ulu öndərin ideyalarının və siyasi kursunun uğurla davam etdirilməsindən danışaraq belə dedi: "Ümummilli liderin siyasi kursunu davam etdirmək üçün mümkün namizədlər içərisində ən layiqlisi olan İlham Əliyevin Azərbaycan Respublikasının Prezidenti kimi Heydər Əliyev siyasi kursunun davamçısı olması Azərbaycan xalqının tarixi bir şansı və qələbəsidir. Ona görə ki, prezidentimiz cənab İlham Əliyevin bacarığı və siyasi iradəsi nəticəsində Heydər Əliyev ideyaları öz məzmunu və mahiyyətini tam dolğunluğu ilə praktikada təsdiq edə bildi. Bəzən elə olur ki, elmi-siyasi baxımdan düzgün olan nəzəriyyə belə müəyyən səbəblərdən öz təsdiqini tara bilmir və tarixin arxivinə atılıb qalır. Lakin Heydər Əliyev ideyaları və siyasi kursu real elmi-siyasi həqiqətlərə söykənərək reallıqda özünü təsdiq edə bildi. Son illərdə Azərbaycanın regionda və dünyada analoqu olmayan şəkildə inkişaf etməsi, müasirləşməsi, demokratik və hüquqi bir dövlət kimi dünya dövlətləri içərisində özünə layiqli yer tutması bu deyilənləri sübut edir”.
Çıxışını davam etdirərək Qafar Əliyev bildirdi ki, ulu öndərin xatirəsi təkcə Azərbaycanda deyil, bütün dünyada, Yaponiyadan tutmuş Amerikaya qədər – Yer kürəsinin hər yerində qeyd edilir. Anım mərasimlərinə təkcə azərbaycanlılar deyil, bütün türk, müsəlman aləminin, həmçinin dünyanın digər millətlərinin nümayəndələri də qatılır. Ona görə ki, Heydər Əliyevin gördüyü işlər, onun əməlləri təkcə Azərbaycan xalqına və dövlətinə deyil, həm də regiona və bütün dünyaya fayda verən əməllər idi. Çıxışçı mühüm bir məqamı xüsusi olaraq vurğuladı ki, Heydər Əliyevin anılması, onun xatirəsinin yad edilməsi təkcə bu dahi rəhbərin gördüyü işlərin sadalanması və yada salınması ilə bitməməlidir. Bəzən elə olur ki, ulu öndərin böyük işlərindən, əməllərindən danışırlar və bununla da öz işlərini bitmiş hesab edirlər. Amma ümummilli lideri yad etmək, onu anmaq ona görə vacib və əhəmiyyətlidir ki, biz öz əməllərimizdə Heydər Əliyev ideyalarına sadiq qalaq, onun kimi haqq-ədalət yolunda vuruşaq və mübarizə araraq, haqqı nahaqqa verməyək, xalqımıza, dövlətimizə layiqincə və sonadək xidmət edək. Sonda Qafar Əliyev bütün gəncləri Heydər Əliyev ideyalarına sadiq olmağa, bu ideyaları yaşatmağa, Vətənə və dövlətə sədaqətli gənclər kimi yetişməyə, bilikli, savadlı və mübariz olmağa çağırdı.

Məlumat üçün bildirək ki, GPM tərəfindən həyata keçirilən "Gənc Tədqiqatçıların Elmi Potensiallarının Artırılması” (GTEPA) adlı layihə müxtəlif elm sahələri üzrə elmi tədqiqatlar aparan magistr, dissertant və doktorantlar, gənc alimlər və ümumiyyətlə elmi tədqiqata meyilli olan potensial gənc tədqiqatçıların elmi, siyasi dünyagörüşünün formalaşması məqsədi ilə həyata keçirilir.
Layihənin həyata keçirilməsində həmçinin elmi tədqiqat zamanı meydana çıxan problemlərin çevik və qısa zamanda həllini tarmaq bacarığını aşılamaq, elmi tədqiqatın üsul və vasitələrini izah etmək, sosioloji sorğuların keçirilməsi və statistikanın ararılması, ictimai rəyin öyrənilməsi kimi metodlar haqda biliklər vermək kimi digər məqsədlər də güdülür.
Layihədən ümumilikdə 50-dən artıq gənc elmi tədqiqatçı faydalanmaqdadır. Layihə ilin sonunda Odlar Yurdu Universiteti ilə GPM-nin birlikdə keçirəcəyi elmi-praktik konfransla yekunlaşacaq.

Cavanşir Qədimov
Elnur Ağayev