Sabiq ekologiya və təbii sərvətlər naziri Hüseyn Bağırov mətbuatda və məhkəmə prosesində naziriliyin Hidrometeorologiya Departamentinin baş mühasibi tərəfindən haqqında səsləndirilən böhtan xarakterli ittihamlara görə xüsusi ittiham qaydasında şikayətlə məhkəməyə müraciət edib.
Qeyd edək ki, Bakı Ağır Cinayətlər Məhkəməsində ETSN-in Hidrometeorologiya Departamentinin direktoru olmuş Əkbər Həsənov, Departamentin baş mühasibi olmuş İlqar Hacıyev, Departamentin digər əməkdaşları - Orxan Qasımov, Tural Hacızadə və Təbriz Əliyev təqsirləndirilən şəxs qismində hakim önünə çıxarılıblar. Onlar dövlət büdcəsindən ayrılmış 451 min manatı mənimsəməkdə ittiham olunurlar. Baş mühasib istintaqa ilkin ifadələrində günahını etiraf etsə də, sonradan məsuliyyəti keçmiş nazirin üzərinə ataraq, vəsaitləri ona çatdırdığına dair ittihamlar səsləndirib. Qarşı tərəf isə açıqlamasında bildirib ki, baş mühasibin həyata keçirdiyi maliyyə maxinasiyaları sabiq nazir H.Bağırovun vəzifəsindən getdiyi dövrdən sonraya (iyun, iyul, avqust, sentyabr, oktyabr) təsadüf edib. İstintaq araşdırmaları ilə də təsdiqlənib ki, bu faktın sabiq nazirə heç bir aidiyyəti yoxdur. Bunu müttəhimlərdən biri - Departamentinin direktoru olmuş Əkbər Həsənov da istintaqa və məhkəməyə ifadəsində qeyd edib.
Xəbərdən istifadə edərkən istinad etmək vacibdir.