"Əvvəla, onu qeyd edim ki, bizdə heç  Arzu Abdulova adlı işçi yoxdur"

Bu sözləri «Azərenerji» ASC-nin Sumqayıt Elektrik Şəbəkəsin şöbə rəisi Əliyar Qasımov deyib. Şöbə rəisi onu da qeyd etdi ki, bizdə heç bir ixtisar yoxdur, bu, sadəcə kimlərsə tərəfindən uydurulan bir şayiədir:

"«Azərenerji» ASC-nin Sumqayıt Elektrik Şəbəkəsi işçi götürərkən müqavilə bağlayır. Artıq o işçilərin bəzilərinin bizimlə müqaviləsi bitdiyindən, biz bu cür ixtisarlar edirik. Qaldı ki, mənim işdə qalmağıma, bunu mən yox, rəhbərlik istəyib. Səbəbi isə mənim təcrübəli mütəxəsis olmağımdır".

Qeyd edək ki, Jam.az saytına şəbəkənin işçiləri adından müraciət edən Arzu Abdulova bildirib ki, hal-hazırda siyahının hazırlanması prosesi başa çatıb. 

Lakin kimlərin ixtisara düşəcəyi barədə heç kimə məlumat verilmir. «Dolayı şəkildə öyrənmişik ki, pensiyaçılar, orta təhsilli işçilər qala-qala, ixtisar siyahısında ,əsasən, cavan və ali təhsillilər yer alıb. Və ən qəribəsi odur ki, ümumi şöbənin rəisi Əliyar Qasımov, İqtisadiyyat şöbəsinin rəisi Səadət Həsənova, İstismar idarəsinin baş mühəndis müavini Bəylər Nurullayev kimi pensiyaçıların adları ixtisar siyahısında yoxdur. Bundan əlavə, adları ixtisar siyahısına salınanların çoxu ailəsinin yeganə işləyən şəxsləridir».

Arzu Abdulova yazır ki, Sumqayıt REŞ MMC-də az qala ailəlikcə işləyən çoxlu sayda işçilər var. «Bir ailədən ər-arvad, ata-oğul və ya gəlini ilə birgə işləyənin heç biri ixtisara salınmır. Bu isə böyük bir ədalətsizlikdir və kütləvi haqlı narazılıqlara səbəb yaradır»   (xeberlent.az)