Sumqayıt şəhərində xüsusi karantin rejimi ilə bağlı mütəmadi olaraq
reydlər davam etdirilir. Şəhər ərazisində Operativ Qərargah tərəfindən
müəyyən edilən tələb və qaydaların təmin olunması üçün ciddi nəzarət
tədbirləri həyata keçirilir.
Xeberle.com-a verilən məlumata görə, xüsusi karantin rejiminin tələblərinin icrasına nəzarət məqsədilə
Sumqayıt şəhərində mobil qruplar yaradılmışdır. Sumqayıt şəhər İcra
Hakimiyyətinin, Şəhər Polis İdarəsinin, Mənzil-Kommunal Təsərrüfatı
Birliyinin və şəhər bələdiyyəsinin əməkdaşlarından ibarət mobil qruplar
vasitəsilə şəhər ərazisində maarifləndirmə işləri aparılır.
Sumqayıt şəhər İcra Hakimiyyətinin başçısı Zakir Fərəcov, hüquq
mühafizə orqanlarının rəhbərləri və şəhərdə yaradılan mobil işçi qrupun
üzvləri şəhər ərazisində fəaliyyət göstərən marketlərdə və
fəaliyyətlərinə icazə verilmiş digər obyektlərdə növbəti monitorinq
həyata keçirib.
Monitorinq zamanı Nazirlər Kabineti yanında yaradılmış Operativ
Qərargahın tələb və tövsiyələrinə riayət edilməsinin vəziyyəti
yoxlanılıb, mövcud çatışmazlıqlarla bağlı cavabdeh şəxslərə xəbərdarlıq
edilərək müvafiq göstərişlər verilib.
Reydlər zamanı şəhər sakinləri ilə maarifləndirici söhbətlər
aparılıb, karantin rejimi qaydalarına riayət olunmasının vacibliyi
vurğulanıb.
Xəbərdən istifadə edərkən istinad etmək vacibdir.
