Sumqayıtda şəhidin adına xatirə bulağı açılıb.
Xeberle.com-un məlumatına görə, şəhərin 18-ci mikrorayonunda 44 günlük
Vətən müharibəsi zamanı şəhidlik zirvəsinə ucalan Elvin Novruzovun
adına doğum günü münasibəti ilə inşa edilən xatirə bulağının açılış mərasimi keçirilib.
Açılış mərasimində şəhidin yaxınları, ictimaiyyət nümayəndələri iştirak ediblər.
Mərasimdə E. Novruzovun döyüş meydanında göstərdiyi şücaətdən və 44 günlük Vətən müharibəsində qazanılan qələbənin əhəmiyyətindən danışılıb.
Qeyd edək ki, Elvin Novruzov 2001-ci il mayın 3-də Sumqayıt şəhərində anadan olub. Elvin Novruzov 2019-cu il iyunun 22-si hərbi xidmətə çağırılıb. Xidmətinə Ağcabədidə başlayıb, manqa komandiri olub.
2020-cil
sentyabrın 27-dən işğal altında olan torpaqlarımızın azad edilməsi üçün
başlanan Vətən müharibəsində iştirak edib. Cəbrayıl, Füzuli və Qubadlı
rayonları uğrunda gedən savaşda qəhrəmanlıq göstərib. Oktyabrın 23-də
Qubadlının azad edilməsi uğrunda gedən döyüşlərdə qəhrəmancasına şəhid
olub. Sumqayıt Şəhidlər Xiyabanında dəfn edilib.
O,
ölümündən sonra "Vətən uğrunda", "Cəbrayılın azad olunmasına görə" və
"Qubadlının azad olunmasına görə" medalları ilə təltif edilib.
Xəbərdən istifadə edərkən istinad etmək vacibdir.
