"Bu gün daş yağmasa, bir daha yağmasın...”.

Şəhidlər Xiyabanında növbəti xoşagəlməz hadisə baş verib.

Bu barədə Şir Əli adlı Facebook istifadəçisi öz səhifəsində məlumat paylaşıb.

Azərbaycanın Milli Qəhrəmanı, Qarabağ müharibəsində şəhid olmuş Çingiz Mustafayevin məzarının 2 müxtəlif vaxtlarda çəkilmiş şəklini paylaşan Ş.Əli qəhrəmanın məzarı üzərinə qoyulmuş yeni qərənfillərin oğurlanmasına diqqəti çəkib.

"2 şəkil arasında təxminən 17 saat fərq var. Biri 18 yanvar saat 17:00 radələrində, digəri bu səhər təxminən 09.30-da çəkilib. İnsanlar bu qədər pis olmağı, şərəfsiz olmağı necə bacarırlar? Biz bu insanlarla eyni süfrədə otururuq, eyni ölkədə yaşayırıq, eyni hava ilə tənəffüs edirik və ən əsası da öləndə üzü eyni qibləyə basdırılırıq. Bu gün daş yağmasa, bir daha yağmasın...”, - deyə, istifadəçi yazıb.

Hazırda məsələ tərəfimizdən araşdırılır.

Onu da qeyd edək ki, bundan əvvəl Şəhidlər Xiyabanında daha bir insident yaranmışdı, "20 Yanvar” faciəsi qurbanları olan İlham və Fərizənin məzarı təhqir olunmuşdu.    (oxu.az)