Filmin bir çox ölkələrdə nümayiş etdirilməsi nəzərdə tutulur.
Yanvarın 19-da Nizami Kino Mərkəzində Vahid Mustafayevin "Qanlı Yanvar” bədii filminin təqdimatı keçirilib.
Filmdə baş rollarda tanınmış türk aktrisası Nəbahət Çehrə, yerli aktyorlar Faiq Mirzəyev, Azər Aydəmir, dünya şöhrətli amerikalı aktyor Leyn Devis çəkiliblər.
Filmin təqdimat mərasimində rəsmi şəxslər, millət vəkilləri, incəsənət xadimləri ilə yanaşı 20 yanvar şəhidlərinin ailə üzvləri də iştirak ediblər.
Filmin təqdimatından sonra ssenari müəllifi və rejissor Vahid Mustafayev bildirib ki, film 63 gün ərzində çəkilib. O, filmin beynəlmiləl heyətinə təşəkkürünü bildirib.
Daha sonra çıxış edən aktrisa Nəbahət Çehrə göz yaşlarını saxlaya bilməyərək 20 yanvar faciəsinin tarixini artıq daha yaxından bildiyini deyib. O, filmin ərsəyə gəlməsində əməyi olan hər bir kəsə minnətdarlıq edərək Azərbaycanı ikinci vətəni hesab etdiyini bildirib.
"Qanlı Yanvar” filminin bir çox ölkələrdə nümayiş etdirilməsi və nüfuzlu beynəlxalq film festivalarına təqdim olunması nəzərdə tutulur. Film bu gündən etibarən Bakı kinoteatrları ilə yanaşı, bütün ölkə kinoteatrlarında da nümayiş olunacaq. (oxu.az)
Xəbərdən istifadə edərkən istinad etmək vacibdir.
