Hövsan qəsəbəsindəki 118 nömrəli orta məktəbin direktoru Qardaşxan Səlimovun polisə çağırıldığı xəbəri yayılıb.
Məsuliyyətsiz sözləri ilə kütləvi etiraz yaratmış direktorun ifadəsi alınıb.
Hazırda prokurorluqda kütləvi etiraz zamanı həyatını itirən 21 yaşlı Elmar Əliyevin ölüm faktı ilə bağlı araşdırma aparılır. Araşdırmanın nəticəsi olaraq Q.Səlimova cinayət işi açılacağı istisna olunmur. Hazırda tibbi ekspertizanın nəticələri gözlənilir. Yaxınlarının məlumatına görə, hərbi xidmətdən yenicə qayıdan gəncin praktiki sağlam olduğu halda birdən-birə ölməsi müəmmalı suallar yaradır.
Suraxanı rayon Polis İdarəsinin 30-cu polis bölməsi və Suraxanı RPİ-dən hadisə barədə açıqlama verilməyib. Suraxanı rayon prokurorunu əvəz edən Rövşən Maqsudov və müavini Camal Abbasov da zəngləri cavablandırmayıb.
Gəncin ölümü ilə bağlı Analitik.az-a danışan hüquqşünas Xəyal Feyzullayev bildirib ki, 21 yaşlı gənc məktəbdə qarşıdurma nəticəsində həyatını itirib: "Bu mənada baş vermiş hadisədə cinayətin izlərinin olması mümkündür”.
Hüquqşünas hadisə ilə bağlı Cinayət Məcəlləsinin 124 və ya 125-ci maddəsinin tətbiqinin mümkünlüyünü istisna etməyib:
"Bu, ehtiyatsızlıqdan adam öldürmə və ya özünü öldürmə həddinə çatdırma kimi cinayət əməllərinin əlamətlərinin aşkar olunub-olunmamasından asılıdır”. (axar.az)
Xəbərdən istifadə edərkən istinad etmək vacibdir.
