Vətən müharibəsi şəhidlərinin xatirəsinə ehtiram əlaməti olaraq Bakıda bu gün keçirilən yürüşdə Prezident İlham Əliyev Xüsusi Təyinatlı Qüvvələrin baş leytenantı Adil İbrahimlinin, Birinci vitse-prezident Mehriban Əliyeva Gəncə terroru zamanı şəhid olan 10 aylıq Narin Xalıqovanın portretini qürurla daşıyıb.

Adil İbrahimlini tanıyaq...

Ali Baş Komandanın tutduğu portretdəki Adil İbrahimli Vətən Müharibəsinin sonuncu günlərində, Şuşa istiqamətində aparılan döyüş əməliyyatlarında, Xocavənd rayonu ərazisində şəhid olub. II Fəxri xiyabanda dəfn olunub. Dəfn mərasimi zamanı onun cənazəsini həyat yoldaşı Nargül daşıyıb.

Qeyd edək ki, Adil Asəm oğlu İbrahimli 9 sentyabr 1992-ci ildə Sumqayıt şəhərində anadan olub. 1999-2008-ci illərdə Sumqayıt şəhərində 14 nömrəli tam orta məktəbdə, 2008-2011-ci illərdə isə Cəmşid Naxçıvanski adına Hərbi Liseydətəhsil alıb. 2011-2015-ci illərdəHeydərƏliyev adına Azərbaycan Ali Hərbi Məktəbində(AAHM) ali hərbi təhsil alıb.

A. İbrahimli 2015-2017-ci illərdə Azərbaycan Silahlı Qüvvələrinin "N" saylı hərbi hissəsində xidmət edirdi. 2017-ci ildən isə Xüsusi Təyinatlı Qüvvələrin sıralarında Baş Kəşfiyyatçı, Qrup Komandirinin müavini, Qrup Komandiri vəzifələrində xidmət edib.

Azərbaycan Ordusunun baş leytenantı olan Adil İbrahimli 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsi zamanı Murovdağ döyüşlərində, həmçinin Cəbrayılın, Füzulinin, Xocavəndin və Şuşanın azadlığı uğrunda gedən döyüşlərdə savaşıb.

Adil İbrahimli noyabrın 7-də Şuşa döyüşləri zamanı şəhid olub.

Prezidentin 9 dekabr sərəncamı ilə ölümündən sonra "Vətən Müharibəsi Qəhrəmanı” adı verilib. Bununla yanaşı, o "Vətən uğrunda”, "Şuşanın azad olunmasına görə” və"Kəlbəcərin azad olunmasına görə” medalları ilə də təltif edilib.

Doğulduğu Sumqayıt şəhərinin 4-cü mikrorayonunda xatirəsinə bulaq inşa edilib.