Sumqayıt Regional Mədəniyyət İdarəsinə tabeli Zəngilan rayon Nümayəndəliyinin rəhbər işçiləri 1 Oktyabr 2021-ci il tarixdə İkinci Qarabağ Müharibəsində şəhid olan İsmayıl Davud oğlu Mehdiyevin ailəsini ziyarət edib.
Kollektiv ailənin qayğıları ilə maraqlanıb. Şəhidimizin həyat yoluna nəzər salınıb, ailəsinə onun şəkillərindən hazırlanan foto albom təqdim olunub.
Əslən Zəngilan rayonunun Mincivan qəsəbəsindən olan İsmayıl Mehdiyev 23 yanvar 2002-ci ildə Bakı şəhərində anadan olub. 2008-2016-cı illərdə Abşeron rayonu Xırdalan qəsəbəsində fəaliyyət göstərən Laçın rayonunun 1 saylı məktəbində təhsilə başlayıb. 8-ci sinfi bitirdikdən sonra Naxçıvan şəhərində Heydər Əliyev adına hərbi litseydə təhsilini davam etdirib. 2019-cu ildə Bakı şəhərində Heydər Əliyev adına Azərbaycan Ali Hərbi Məktəbində hərbi təhsil almağa başlayıb.
2020-ci ilin may ayında ərizə yazaraq cəbhə bölgəsinə yollanıb. 27 sentyabr 2020-ci ildə torpaqlarımızın işğaldan azad edilməsi uğrunda gedən döyüşlərə könüllü olaraq qatılıb. Döyüşlərdə böyük şücaət göstərərək Zəngilan, Qubadlı rayonlarının alınmasında iştirak edib, Xocəvənd istiqamətində gedən döyüşlərdə, yuxarı Veysəlli kəndində 2020-ci il noyabrın 1-də itkin düşüb.
Şəhidin nəşi dekabr ayının 12-də tapılıb, II Fəxri Xiyabanda dəfn olunub. Azərbaycan Respublikası Prezidenti cənab İlham Əliyevin Sərəncamı ilə İ. Mehdiyev ölümündən sonra "Vətən uğrunda”, "Xocavəndin azad olunmasına görə" medalları ilə təltif edilib.
Allah rəhmət eləsin!
Xəbərdən istifadə edərkən istinad etmək vacibdir.
