Xalqımız İkinci Qarabağ müharibəsindəki Zəfəri ilə bir ölkə kimi özünü yenidən kəşf etdi. Unudulmaz Qələbəmizlə qürurumuz daha da möhkəmləndi. Bu tarix Azərbaycan xalqının şərəf və ləyaqət tarixidir. Biz bütün bunlara görə cənab Prezident İlham Əliyevə və Azərbaycan Ordusuna, Azərbaycan əsgərinə hər zaman minnətdarıq, onların qarşısında baş əyirik. Torpaqlarımızın yenidən bərpası üçün Vətən naminə canını sipər edən şəhidlərimizə, igidlərimizə borcluyuq.
Sumqayıt Regional Mədəniyyət İdarəsinə tabe olan Şuşa rayon nümayəndəliyi şəhid ailələrini yad edir, şəhidlərlə bağlı tədbirlər təşkil edirlər.
Şuşa rayon MKS-nin əməkdaşları şəhid Samir Ələkbərlinin yaxınları ilə görüşüb. Ailə üzvləri şəhidimiz haqqında qürurla danışıb, xoş xatirələrini bölüşüblər. Kollektiv Samirin ailəsinə Allahdan səbr diləyib və daim onların yanında olduqlarını vurğulayıblar.
Samir Şamil oğlu Ələkbərli 2 iyul 2002-ci ildə Bərdə rayonunun Qaradəmirçi kəndində doğulub. Əslən şuşalıdır. Qaradəmirçi kənd orta məktəbini bitirib, 2020-ci ilin avqust ayında müddətli hərbi xidmətə çağrılıb. 2020-ci ilin sentyabrında 44 günlük müharibənin iştirakçısı olan Samir, 10 oktyabr tarixində Füzuli rayonu istiqamətində döyüş tapşırığını yerinə yetirərkən qəhrəmancasına şəhid olub. Azərbaycan Respublikası Prezidentinin sərəncamı ilə S. Ələkbərli ölümündən sonra "Vətən uğrunda", "Döyüşlərdə fərqlənməyə görə", "Füzulinin azad olunmasına görə" medalları ilə təltif edilib.
Bununla yanaşı Şuşa şəhər Xəlfəli kənd Uşaq Musiqi məktəbində 44 günlük Vətən müharibəsi qəhrəmanlarının əziz xatirəsinə həsr olunan tədbir keçirilib. Tədbirdə vətən uğrunda canlarından keçmiş şəhidlər bir dəqiqəlik sükutla yad edilib. Məktəbin direktoru çıxış edərək Ali Baş Komandan cənab İlham Əliyevin apardığı müdrik siyasətini və qələbə sevincini bizə yaşadan şəhidlərimizin əvəzsiz rolunu vurğulayıb. Eyni zamanda qeyd edib ki, şəhidlik zirvəsinə ucalan Nurlan Həsənov və Arəstə Baxışova məktəbimizin yetirmələri olub.
Tədbirdə məktəbin şagird və müəllimlərinin ifasında Xudayar təsnifi və Bayatı-Şiraz muğamı səslənib.
Şəhidlər ölməz, Vətən bölünməz!
Xəbərdən istifadə edərkən istinad etmək vacibdir.
