Xəbər verdiyimiz kimi, Sumqayıt Şəhər Bələdiyyəsi müraciət edən sakinləri binanın içərisinə buraxmır. Vətəndaşlar içəridə olan şəxslərə pəncərədən sənədləri təqdim edib, məsələni elə pəncərədəcə həll edirlər. Sumqayıt Şəhər Bələdiyyəsi soyuq hava şəraitində sakinləri bu cür qəbul edir.
Bəs Sumqayıt Bələdiyyəsinin bu qərarının qanuni əsası varmı?
Hüquqşünas Ramil Süleymanov Xeberle.com-a bildirib ki, bələdiyyənin vətəndaşları binanın içərisinə buraxmaması hüquqi baxımdan tamamilə əsassızdır: "Bələdiyyə vətəndaşları bu şəkildə qəbul edə bilməz, əgər həqiqətəndə virusa yoluxmuş əməkdaşları varsa ayda iki dəfədən az olmamaq şərtilə, bələdiyyə binası tam dezinfeksiya olunmalıdır. İkinci isə bələdiyyə aparatı tamamilə ixtisarlaşmış heyətlə işləməlidir. Bununla bağlı əmr verilməlidir. Vətəndaşların bu şəkildə qəbul edilməsi birmənalı şəkildə yolverilməzdir. Bu vətəndaşların vergisinə möhtac olub, fəaliyyətini quran, özünü idarəetmə orqanının vətəndaşın ödədiyi vergiyə hörmətsizliyidir. Özü isti otaqda oturmaqla vətəndaşı soyuqda saxlayaraq sənədlərini qəbul etmək etik davranışlara ziddir. Eyni zamanda, COVİD-19 pasportu olanlara dövlətin qoyduğu qərarlarla xidmət etməli olduğu halda belə bir addım atmaq bələdiyyə tərəfindən özbaşınalıqdan başqa bir şey deyil.
Əks halda Bələdiyyə bəyan etməlidir ki, tamamilə fəaliyyətini dondurur, vətəndaşlardan sənədləri yalnız poçtla qəbul edə bilər. Bələdiyyənin bu şəkildə davranışı özünü kamikadze kimi aparmasına oxşayır. Məgər bələdiyyədə işləyənlər insan deyillərmi, ailələri təhlükədə deyilmi? Bu bələdiyyə aparatının həm işçilərinə, həm də vətəndaşlara qarşı etdiyi qeyri-insani hərəkətdir".
Xədicə Səxavətqızı
Xəbərdən istifadə edərkən istinad etmək vacibdir.
