"Kəndlərdə idmanı inkişaf etdirək” layihəsi çərçivəsində Xızı Rayonun Giləzi kəndində keçirilən tədbirdə ümumilikdə 50 məktəbli uşağa futbola marağı artırmaq məqsədi ilə idman geyimləri və futbol topları verilib.
Xeberle.com xəbər verir ki, bir müddət öncə deputat Müşfiq Məmmədli bununla bağlı AFFA-ya müraciət etmişdi.
Tədbirdə Xızı rayon İcra Hakimiyyətinin başçısı Xəzər Aslanov, deputatlar Məmmədli, Rauf Əliyev
(AFFA-nın vitse-prezidenti, Azərbaycan Uşaq və Gənclər Futbol Federasiyasının prezidenti), Arzu Nağıyev və rayon ictimayyətinin nümayəndələri iştirak edib.
Qeyd edək ki, bu layihə Prezident İlham Əliyevin 25 dekabr 2019-cu il tarixində Azərbaycan Milli Olimpiya Komitəsində idmançılarla görüşü zamanı kəndlərdə idmanın inkişafına dair verdiyi tövsiyələrin yerinə yetirilməsi istiqamətində atılmış addımdır.
Məlumat üçün bildirək ki, qeyd olunan layihə üzrə 2021-ci il ərzində yerli İcra Hakimiyyəti orqanları ilə birlikdə Respublikamızın müxtəlif bölgələrində - Füzuli, Tərtər, Bərdə, Oğuz, Xəzər, Cəbrayıl, Ağdaş, Tovuz, Gədəbəy, Kürdəmir, Salyan, Göyçay, Beyləqan, Göygöl, Qobustan rayonunun qəsəbə və kəndlərində, Gəncə şəhərinin Kəpəz rayonunda Vətən müharibəsi zamanı düşmənin raket hücumuna məruz qaldığı ərazidə "Kəndlərdə idmanı inkişaf etdirək” layihəsi üzrə tədbirlər keçirilib. Bu layihə üzrə silsilə tədbirlərin respublikamızın digər bölgələrində də həyata keçirilməsi nəzərdə tutulub.
Xəbərdən istifadə edərkən istinad etmək vacibdir.
