Jurnalın mövzuları ətrafında fikir mübadiləsi aparılıb.

Azərbaycan Milli Elmlər Akademiyası Fəlsəfə və Hüquq İnstitutunda ABŞ-ın Milli Coğrafiya Cəmiyyəti və "Qarant Media Holdinq”in dəstəyi ilə nəşr olunan "National Geographic Azərbaycan” jurnalının təqdimatı keçirilib.

Təqdimatı İnstitutun direktoru, fəlsəfə üzrə elmlər doktoru İlham Məmmədzadə açıb. Daha sonra jurnalın baş redaktoruSeymur Teymurov Milli Coğrafiya Cəmiyyətinin fəaliyyətindən və jurnalın Azərbaycan dilində buraxılışının əhəmiyyətindən danışıb.

O, "National Geographic Azərbaycan”da aparıcı dünya alimlərinin elmi yenilikləri, müxtəlif ölkələrin ən maraqlı yerləri, təbiəti ilə yanaşı, Azərbaycanla bağlı indiyənə qədər heç yerdə nəşr olunmamış fotoların da yer aldığını vurğulayıb. Bildirib ki, Türkiyə, Rusiya, Fransa, Estoniya və digər ölkələrdə çap olunan jurnalın Azərbaycan dilində buraxılışı 30.000 tirajla nəşr olunur.

Təqdimatın davamında Fəlsəfə və Hüquq İnstitutunun elmi işlər üzrə direktor müavini, fəlsəfə üzrə fəlsəfə doktoru, dosent Roida Rzayeva, şöbə müdirləri, fəlsəfə üzrə elmlər doktorları Rəfiqə Əzimova və Rəna Mirzəzadə jurnalın fəaliyyətini yüksək qiymətləndiriblər. Seymur Teymurov alimlərin suallarını cavablandırıb, jurnalın mövzuları ətrafında fikir mübadiləsi aparılıb. (oxu.az)