Sumqayıt Regional Mədəniyyət İdarəsinə tabe olan Mərkəzləşdirilmiş Kitabxana Sisteminin Mərkəzi uşaq kitabxanasının kollektivi II Qarabağ müharibəsində Qubadlı rayonu uğrunda gedən döyüşlərdə şəhid olan Elvin Novruzovun əziz xatirəsini yad etmək məqsədilə qəhrəmanın ailəsini ziyarət ediblər.
Görüş zamanı 44 günlük Vətən müharibəsində qazanılan qələbədə övladının da payı olduğu üçün fəxr etdiyini bildirən şəhid anası Gülşən Novruzova oğlunun uşaqlıq illərindən, məktəb həyatından, onun keçdiyi döyüş yolundan, xatirlərindən söhbət açıb.
Elvin Novruzov 3 may 2001-ci ildə Sumqayıt şəhərində zəhmətkeş, sadə ailədə dünyaya gəlib. İlk təhsilini 2007-2018-ci illərdə Sumqayıt şəhər T.İsmayılov adına 29 nömrəli tam orta məktəbdə alıb. 2019-cu il 21 iyulda həqiqi hərbi xidmətə yola düşüb. Xidmətinə Ağcabədi rayonunda yerləşən hərbi hissələrin birində başlayan şəhidimiz manqa komandiri vəzifəsinə kimi yüksəlib.
2020-ci il 21 oktyabrda Qubadlının azadlığı uğrunda gedən döyüşdə şəhidlik zirvəsinə ucalıb. 23 oktyabr Sumqayıt şəhər Şəhidlər Xiyabanında torpağa tapşırılıb.
Azərbaycan Respublikasının Prezidenti cənab İlham Əliyevin müvafiq Sərəncamlarına əsasən Elvin Novruzov ölümündən sonra "Vətən uğrunda”, "Qubadlının azad olunmasına görə”, "Cəbrayılın azad olunmasına görə” medalları ilə təltif edilib.
Kitabxananın əməkdaşları şəhidin qısa, lakin mənalı həyatını, qəhrəmanlıq dolu döyüş yolunu əks etdirən fotoşəkilləri, şəxsi əşyaları, təltif olunduğu medalları ilə tanış olublar.
Sonda şəhidlərimizlə qürur duyduqlarını bildirən kollektiv şəhidlərimizə allahdan rəhmət, ailələrinə səbir diləyib və ailəyə sovqat paylarını təqdim ediblər. Qəhrəman ailəsidə öz növbəsində onlara göstərilən diqqət və qayğıya görə Ölkə rəhbərliyinə təşəkkürünü bildirib.
Xəbərdən istifadə edərkən istinad etmək vacibdir.
