Sumqayıtda 2020-ci ildə baş vermiş subasmaya görə iki dövlət qurumu üz-üzə gəlib.
2020-ci il dekabrın 20-də Sumqayıt şəhəri, 44-cü məhəllədə yerləşən "TERM” İdman Kompleksinin, Sumqayıt Müəllimlər Universitetinin binası və digər obyektlər Sumqayıt Sukanal İdarəsinin balansında olan və Bakı küçəsindən keçən kanalizasiya kollektorunun tutulması nəticəsində subasmaya məruz qalıb.
Subasma nəticəsində zərər görən obyektlərə "Azsığorta” tərəfindən 165 min manat ödəniş edilib. Bu günlərdə isə "Azsığorta” şirkəti Bakı Kommersiya Məhkəməsinə müraciət edərək "Azərsu”ya qarşı iddia qaldıraraq dəyən zərərə görə verilən kompensasiyanın onlara ödənilməsini tələb edib. İşə hakim Kənan Hüseynovun sədrliyi ilə baxılır.
"Azərsu” Açıq Səhmdar Cəmiyyətinin Mətbuat xidməti və ictimaiyyətlə əlaqələr şöbəsinin rəhbəri Anar Cəbrayıllı kanalizasiya suyunun daşaraq obyeklərə dolmasının səbəbini açıqlayıb. O bildirib ki, 2020-ci ilin dekabr ayında şəhərin Bakı küçəsindən keçən və Universitetin qarşısındakı "Alman parkı” deyilən ərazidə kollektor borusunda qəza baş verib: "Həmin boru Sumqayıtda formalaşan tullantıların təxminən üçdə ikisini təmizləyici qurğuya daşıyır. Kollektorun istismar müddəti başa çatmış hissəsində qəza baş verib. Nəticədə Sumqayıt şəhərindəki bəzi binalara və obyektlərə su dolmuşdu. Qəzanın aradan qaldırılması üçün layihə hazırdır, ötən il işlər yekunlaşdı. 1350 metr uzunluğunda 1000 millimetr diametrliyində kanalizasiya kollektorları yenidən quruldu. Orada yeni birləşmələr qoyuldu və yolun qazılmış hissələri asfaltlanıb”.(qafqazinfo.az)
Xəbərdən istifadə edərkən istinad etmək vacibdir.
