İyulun 8-də Qurban bayramı münasibətilə Mədəniyyət İşçiləri Həmkarlar İttifaqının Qubadlı Rayon Komitəsinin sədri Yaqub Vəliyevin təşəbbüs və təşkilatçılığı ilə 44 günlük Vətən müharibəsinin şəhidi Ramil Elşən oğlu Quliyevin ailəsi ziyarət olunub.
Qeyd edək ki, Ramil Elşən oğlu Quliyev 1991-ci ilin yanvar ayının 4-də Qubadlı rayonunda anadan olub. Ali təhsilini Ukraynada alıb. 2015-ci ilin iyul ayında hərbi xidmətə yollanaraq, baş atıcı olaraq Lələtəpə uğrunda gedən döyüşlərdə iştirak edib. 27 sentyabrda səfərbərlik elan edilməmişdən əvvəl könüllü olaraq müharibəyə yazılıb. 44 günlük müharibədə Hadrut uğrunda gedən döyüşlərdə verilən tapşırığı yerinə yetirərkən düşmənin snayper gülləsinə tuş gələrək qəhrəmancasına şəhid olub. 12 gün neytral zonada qalan şəhidimizi Ülvi adlı əsgər yoldaşı 4 km çiynində daşıyaraq arxa cəbhəyə təhvil verib. Oktyabr ayının 22-də Sumqayıtda şəhidlər xiyabanında dəfn olunub. Ölümündən sonra Azərbaycan Respublikasının Prezidenti cənab İlham Əliyevin Sərəncamına əsasən "Vətən Uğrunda”, ”İgidliyə görə”, "Füzulinin azad olunmasına görə”, "Qubadlının azad olunmasına görə” medalları ilə təltif olunub.
Mədəniyyət İşçiləri Həmkarlar İttifaqının Qubadlı Rayon Komitəsinin sədri və əməkdaşları tərəfindən şəhid ailəsinin xatirələri dinlənilib, şəhidin xatirə fotolarına baxılıb.
Kollektiv şəhidin ailəsinə maddi və mənəvi dəstək göstərib.
Xəbərdən istifadə edərkən istinad etmək vacibdir.
