"Abşeron rayon məhkəməsinin baxdığı cinayət işlərinin 70-80%-i yol-nəqliyyat hadisələridir (CM-in 263, 263-1 və 264-cü maddələri). Bu o deməkdir ki, Bakı-Sumqayıt, Bakı-Şamaxı və Xırdalan-Novxanı yollarında qırğın davam edir”.

Bu açıqlama ilə yol hərəkəti üzrə ekspert Ərşad Hüseynov çıxış edib. O bu yolların maraqlı özəlliyinin olduğunu bildirib:

"Vəkil dostlarımdan biri deyir ki, Abşeron rayon məhkəməsinin baxdığı cinayət işlərinin 70-80%-i yol-nəqliyyat hadisələridir (CM-in 263, 263-1 və 264-cü maddələri). Bu o deməkdir ki, Bakı-Sumqayıt, Bakı-Şamaxı və Xırdalan-Novxanı yollarında qırğın davam edir. Bu 3 yolun maraqlı özəlliyi var. Hər 3 yol Abşeron yarımadasında ən intensiv hərəkət olan yollardandır. Özü də ətrafları yaşayış məskənləridir. Ona görə də piyadalar da çoxdur. Bakı-Sumqayıt yolunda ekologiya postundan Sumqayıt döngəsinə qədər, Bakı-Şamaxı yolunda Sulutəpə dairəsindən Müşfiq qəsəbəsinə qədər, Xırdalan-Novxanı yolunun isə hər yerində sürətlə sürmək mümkün olur. Piyada və sürücü intizamsızlığı, habelə yol hərəkətinin təşkilindəki qüsurlar (gecə vaxtı işıqların olmaması, yolun kənarında təhlükəli təpələr və onun arxasından qəfil çıxan piyada və ya avtomobillər və s.) bu yolları faciə məkanına çevirir, nəticədə məhkəmələrin iş yükü ağır olur...”   (axar.az)