Avropa İttifaqının dəstəyi ilə həyata keçirilən "Atalar Məktəbi - Məsuliyyətli Atalığa Doğru” layihəsi çərçivəsində Sumqayıt şəhərində info-sessiyalar təşkil edilib. İnfo-sessiyaların keçirilməsində əsas məqsədi vətəndaşları layihə barədə məlumatlandırmaq və layihəyə qarşı marağı artırmaqdan ibarət olub.
Ümumilikdə 5 ay davam edəcək "Atalar Məktəbi - Məsuliyyətli Atalığa Doğru” layihəsi ata olmağa hazırlaşan şəxsləri və gənc ataları hədəfləyərək onları övladların inkişafı prosesində fəal iştiraka cəlb etməklə ailələrdə mövcud oturuşmuş davranış normaları və gender-əsaslı stereotiplərinin dəyişdirilməsinə töhvə vermək məqsədi daşıyır.
"Atalar Məktəbi - Məsuliyyətli Atalığa Doğru” layihəsi Avropa İttifaqının maliyyə dəstəyi ilə həyata keçirilən "Avropa İttifaqı Gender Bərabərliyi naminə: Birlikdə gender stereotiplərinə və gender-əsaslı zorakılığa qarşı” və "Cənubi Qafqazda gender əsaslı cins seçimi və aidiyyəti zərərli təcrübələrin aradan qaldırılması” proqramları çərçivəsində BMT-nin Əhali Fondu (UNFPA), BMT-nin Qadınlar üzrə Agentliyi (UN Women), Əmək və Əhalinin Sosial Müdafiəsi Nazirliyi, Gənclər və İdman Nazirliyi və Ailə, Qadın və Uşaq Problemləri üzrə Dövlət Komitəsinin birgə təşkilatçılığı, "Gender Hub Azerbaijan” sosial platforması və "Azərbaycan Maarifçilər Assosiasiyası” tərəfindən icra olunur.
Xəbərdən istifadə edərkən istinad etmək vacibdir.
