Sumqayıta Bakıdan qatar yolu çəkilməsi ilə bağlı məlumatlar yayılar-yayılmaz iqtisadçı Natiq Cəfərli öz facebook səhifəsində maraqlı status paylaşdı.

Statusu olduğu kimi təqdim edirik:

"Rəsmi məlumat: Elektrik qatarlarının Bakıdan Sumqayıta 40 dəqiqəyə getməsi üçün baş yolların təmirinə başlanıb.

"Azərbaycan Dəmir Yolları” Qapalı Səhmdar Cəmiyyəti Mətbuat Katibliyinin rəisi Nadir Əzməmmədovun verdiyi məlumata görə, bunun üçün əlavə Sumqayıt baş stansiyasına daxil olmadan Sumqayıt stansiyasına hərəkət etmək üçün 1,65 km uzunluğunda yeni birləşdirici yolun tikintisi də nəzərdə tutulur. Sən inkişafın, texnologiyanın qüdrətinə bax e, qatar 20 km-lik yolu 40 dəqiqəyə gedəcək, bravo, əla, "molodes”. Hələ bunun üçün 1,6 km əlavə yol çəkəcəklər, yolları təmir edəcəklər, yəni, milyonlarla manat pul xərcləyəcəklər ki, tısbağa sürəti ilə qatar hərəkət etsin.

Məlumat üçün deyim ki, Avropa bir qırağa, Çində ölkədaxili qatarların ortalama sürəti saatda 300 km-dir.Yəni, orada 20 km yol getmək üçün, elə minən kimi düşürsən, heç oturmağa zamanın yetməz. Hökumətə təklif edirəm ki, bu yola xərclənən vəsaitə hər bir Bakıda çalışan Sumqayıt sakininə son model velosiped alıb-bağışlasınlar, ciddi sözümdür:

1) velosipedlə daha tez çatarlar,

2) Ekologiyaya zərər dəyməz,

3) Sumqayıt əhalisi daha sağlam olar..."   (birlik.az)