Sumqayıt Regional Mədəniyyət İdarəsinə tabe olan Qubadlı Rayon Nümayəndəliyində 44 günlük Vətən müharibəsinin iştirakçısı, Polkovnik-Leytenant Ehtiram Eldar oğlu Məmmədovun 45 yaşı qeyd olunub.
Doğum günündə Qubadlı Rayon İcra Hakimiyyəti başçısının müavini Allahverdi Haqverdiyev və digər məsul işçilər, YAP-nın Qubadlı Rayon Təşkilatının sədri Təhmasib Rüstəmov, qazinin döyüş yoldaşları, hərbi həkimlər, rayon ictimaiyyəti işirak ediblər. Tədbir Azərbaycan Respublikasının Dövlət Himninin səsləndirilməsi ilə başlanıb. Aparıcı qazinin keçdiyi şərəfli həyat yolu haqqında geniş məlumat verib. Vətənimizin azadlığı uğrunda canlarından keçən bütün şəhidlərin əziz xatirəsi bir dəqiqəlik sükutla yad edilib. Ardınca Vasili Əliyev adına Rayon Mədəniyyət evi və Mahmudlu kənd Mədəniyyət evinin hazırladığı kompazisiya, şeirlər söylənilib. Gənc, istedadlı müğənnilərin ifasında bir-birindən gözəl muğam, musiqi nömrələri səsləndirilib. Çıxış edənlər Qaziyə ad günü münasibətilə xoş arzular diləyib, ona hədiyyələr təqdim ediblər.
Qeyd edək ki, qazimiz Ehtiram Məmmədov Azərbaycan Respublikasının Prezidenti cənab İlham Əliyevin 9 dekabr 2020-ci il tarixli Sərəncamı ilə "Qarabağ” ordeni, 25 dekabr 2020-ci il tarixli Sərəncamı ilə "Füzulinin azad olunmasına görə”, 24 iyun 2021-ci il tarixli Sərəncamı ilə "Şuşanın azad olunmasına görə” və eyni tarixli Sərəncamı ilə "Xocavəndin azad olunmasına görə” medalları ilə təltif olunub.
Qazimiz 4 noyabr 2020-ci il tarixində Şuşa uğrunda Daşaltı-Şuşa istiqamətində gedən döyüşlərdə düşmən snayperi tərəfindən ağır yaralanıb.
Allah şəhidlərimizə rəhmət, qazilərimizə isə can sağlığı versin!
Xəbərdən istifadə edərkən istinad etmək vacibdir.
