Aİ və BMTƏF-nin dəstəyi ilə icra edilən "Atalar Məktəbi - Məsuliyyətli Atalığa Doğru” layihəsi çərçivəsində Sumqayıtda təlim keçiriləcək.
Xeberle.com xəbər verir ki, təlim avqustun 6-da saat 10:00-da Sumqayıt Gənclər Evində başlayacaq.
Layihədə məsuliyyətli atalıq konsepsiyası ilə tanış olmağa və öyrənməyə həvəsli olan gənc atalar və ata olmağa hazırlaşan şəxslər iştirak edə bilər.
Layihəyə qoşulmaq üçün anketi (cutt.ly/0KAhD3G) dolduraraq və ya +994 (70) 504-45-47 nömrəsi ilə əlaqə saxlayaraq qeydiyyatdan keçmək tələb olunur.
İki ay davam edəcək "Atalar Məktəbi - Məsuliyyətli Atalığa Doğru” layihəsi gənc ataları və ata olmağa hazırlaşan şəxsləri hədəfləyərək onları övladların inkişafı prosesində fəal iştiraka cəlb etməklə ailələrdə oturuşmuş davranış normaları və gender əsaslı stereotiplərin dəyişdirilməsinə töhvə vermək məqsədi daşıyır.
Qeyd edək ki, "Atalar Məktəbi - Məsuliyyətli Atalığa Doğru” layihəsi Avropa İttifaqının maliyyə dəstəyi ilə həyata keçirilən "Avropa İttifaqı Gender Bərabərliyi naminə: Birlikdə gender stereotiplərinə və gender-əsaslı zorakılığa qarşı” və "Cənubi Qafqazda gender əsaslı cins seçimi və aidiyyəti zərərli təcrübələrin aradan qaldırılması” proqramları çərçivəsində BMT-nin Əhali Fondu (UNFPA), BMT-nin Qadınlar üzrə Agentliyi (UN Women), Əmək və Əhalinin Sosial Müdafiəsi Nazirliyi, Gənclər və İdman Nazirliyi və Ailə, Qadın və Uşaq Problemləri üzrə Dövlət Komitəsinin birgə təşkilatçılığı, "Gender Hub Azerbaijan” sosial platforması və "Azərbaycan Maarifçilər Assosiasiyası” tərəfindən icra olunur.
Xəbərdən istifadə edərkən istinad etmək vacibdir.
