Sumqayıt Regional Mədəniyyət İdarəsinə tabe olan Qubadlı Rayon Nümayəndəliyi tərəfindən Sumqayıt şəhərində yerləşən Q.İlyasov adına Qubadlı şəhər-1 nömrəli tam orta məktəbdə I Qarabağ müharibəsində 18.08.1993-cü il tarixində eyni gündə şəhid olmuş 4 nəfər polis əməkdaşlarımız- Kamal İnqilab oğlu İsayev, İlqar Telman oğlu Bayramov, Ziyəddin Cəlal oğlu Paşayev, Habil Yusif oğlu Süleymanova həsr olunan tədbir keçirilib.
Əvvəlcə Azərbaycan Respublikasının Dövlət Himni səsləndirilib. Sonra torpaqlarımızın bütövlüyü uğrunda canından keçən vətən oğullarının xatirəsini bir dəqiqəlik sükutla yad ediblər.
İcra Hakimiyyətinin məsul işçiləri, idarə, müəssisə, təşkilat rəhbərləri, şəhidlərimizin ailə üzvləri, yaxınları, Qubadlı rayon Polis şöbəsinin əməkdaşları, keçmiş polis işçiləri, eyni zamanda ictimaiyyət nümayəndələri iştirak etdiyi tədbirdə çıxış edən Rayon İcra Hakimiyyəti başçısının müavini Allahverdi Haqverdiyev, keçmiş polis işçisi, mayor Abbasov Azim, Cavid Bədəlov, Qubadlı rayon Polis İdarəsi rəisinin müavini polkovnik-leytenant İlham Rəsulov şəhidlərimizlə bağlı öz xatirələrini bölüşüblər.
Çıxış edən şəhidlərimizin ailə üzvləri, yaxınları – şəhid Kamal İsayevin həyat yoldaşı Fəridə Yaqubova, şəhid Habil Süleymanovun qardaşı Salman Süleymanov, şəhid Ziyəddin Paşayevin həyat yoldaşı Hicran Paşayeva və şəhid İlqar Bayramovun xalası oğlu Şəmsi Bayramov göstərdikləri diqqət və qayğıya görə Ali Baş Komandan, cənab İlham Əliyevə, Birinci vitse-prezident Mehriban xanım Əliyevaya və Qubadlı Rayon İcra Hakimiyyətinin başçısı Malik İsaqova minnətdarlıqlarını bildiriblər və son illər respublikamızda şəhid ailələrinin sosial müdafiəsinin gücləndirilməsi, onların mənzil- məişət şəraitinin yaxşılaşdırılmasına yönəlmiş tədbirləri çıxışlarında yüksək dəyərləndiriblər.
Sonda Vasili Əliyev adına Rayon Mədəniyyət evi və Mahmudlu kənd Mədəniyyət evinin hazırladığı vətənpərvərlik mövzusunda və şəhidlərimizin ruhuna həsr olunan şeirlər və muğam parçaları səsləndirilib.
Xəbərdən istifadə edərkən istinad etmək vacibdir.
