Zeyqəm Hüseynovun adından dələduzluq edildiyi bildirilir...
Xeberle.com moderator.az saytına istinadən Sumqayıt şəhəri 8-ci mikrorayon, ev 31, mənzil 2-də qeydiyyatda olan və yaşayan Hüseynova Günəş Həbib qızı tərəfindən Sumqayıt şəhər məhkəməsinin sədri Zeyqəm Hüseynova ünvanlanan şikayət ərizəsinin surətini təqdim edir
Məktubda deyilir:
"Yazaraq Sizə bildirirəm ki, Sumqayıt şəhər məhkəməsinin keçmiş hakimi Şövkət Nəcəfovanın icraatında mənim Əliyev İsmayıl İbrahim oğluna qarşı alqı-satqı müqaviləsinin və özəlləşmənin ləğv edilməsi tələbinə dair iddiam məhkəmənin qətnaməsinə əsasən rədd edilmişdir. Tərəfimdən həmin qətnamədən verilmiş apellyasiya və kassasiya şikayətləri təmin olunmayaraq Sumqayıt şəhər məhkəməsinin qətnaməsi qüvvədə saxlanılmışdır. 2011-ci ilin fevral ayının 5-də bu məsələ ilə bağlı mən hüquq məsləhətxanasına müraciət edəndə Xanım adlı nümayəndə ilə tanış oldum və ondan işimlə bağlı məsləhət alanda mənə dedi ki, bu işi sənin xeyrinə Ali Məhkəmənin Plenumunda həll edə bilərəm. Mənə dedi ki, plenumun 6 nəfər üzvünə pul verməliyəm və məndən 15 min manat pul istədi. Mən də ona inanaraq işimin düzəlməsi üçün bu məbləği borc alaraq 2011-ci ilin mart ayında Xanım adlı şəxsə verdim. İşimin bu vaxta kimi uzanmasına görə borc aldığım adam məni sıxışdıraraq pulunu tələb etdikdə "Bank of Baku”dan kredit götürərək borcumu qaytarmışam və bu günə kimi də kredit ödəyirəm. Xanım adlı şəxslə görüşüb işimlə maraqlananda bildirdi ki, Zeyqəm müəllimlə danışmışam, iş məhkəmin hakimi Vladimir Ruvinova verilmişdir. Məhkəməyə gələrək maraqlandıqda isə mənim işimin məhkəmədə olmadığı və Ali Məhkəmənin Plenumuna müraciət etmədiyi məlum olmuşdur. Beləliklə də o mənim etibarımdan sui-istifadə edərək dələduzluq etmişdir. Ona görə də onun barəsində qanuni tədbir görməyinizi Sizdən xahiş edirəm”.