Uzun zamandır Sumqayıtla bağlı bloq açmaq fikri beynimizdə dolaşsa da, müxtəlif xırda səbəblərə görə bloqun açılması bu gün, yəni 2014-cü ilin mart ayının 13-dən 14-nə keçən gecə baş tutdu. Daha dəqiqini desək, Əhli Sumqayıt adlı bloq 14 mart 2014-cü il tarixində şəhər sakinlərinin istifadəsinə verilib.

  Bloqun ad seçiminə gəldikdə isə öncə onu bildirmək istəyirik ki, "Sumqayıt Camaatı" və "Əhli Sumqayıt" seçimi qarşısında qalsaq da, "Əhli Sumqayıt" adına üstünlük verdik. Buna səbəb kimi beynəlxalq aləmdə terror təşkilatı kimi tanınan "Sumqayıt Camaatı" adlı camaatlığın olması və buna görə də ad plagiatlığı etmək istəməməyimizdir. Beləliklə bu və "bu zordur" kimi səbəblərdən yekun qərara gəldik ki, bloqun adı "Ahli Sumgait" (Əhli Sumqayıt) olsun.

  "Bu bloq niyə açılıb? Məqsəd və məramı nədir?" kimi suallar sizin kimi bizi də düşündürdü. Blogun açılmasının əsas səbəbi Sumqayıtı və Sumqayıt həqiqətlərini dünya ictimaiyyətinə çatdırmaq və bununla da onlarda Sumqayıt haqqında təsəvvür yaratmaqdır.

  Bloqda nələr olacaq?

Blogda hər şey olacaq desək, sizi aldadarıq. Çünki inanmırıq ki, kulinariya və şou-biznes xəbərlərinə aid nəsə olsun. Yenə də bilmək olmaz taleyin işini. Amma qəti əminliklə demək olar ki, bloqu Sumqayıtın vikipediyasına çevirmək üçün bacardığımız qədər çalışacağıq. Təbii ki, bu önəmli və önəmli olduğu qədər də bir o qədər məsuliyyətli işdə sizlərin də dəstəyinizə ehtiyacımız var. Hələlik mənəvi dəstək ola bilərsiniz.

 Son söz olaraq nə deyə bilərik?

El-obaya xeyirli olsun.

 Hörmətlə;

Əhli Sumqayıt bloqunun idarə heyəti