Xeberle.com-unməlumatına görə, bu gün- şəhidin doğum günündə yaşadığı binada xatirə lövhəsinin açılışı olub.

Tədbirdə E. Nəsibovun şücaəti və keçdiyi döyüş yolundan danışılıb. Xatirə lövhəsinin açılışından sonra tədbir N. Nərimanov adına Mədəniyyət Mərkəzində, ardından isə "Ceyran” restoranında davam etdirilib.

Qeyd edək ki, Elmar Şirzad oğlu Nəsibov 19 sentyabr 1987-ci ildə Sumqayıt şəhərində anadan olub. 2005-ci ildə orta məktəbi bitirən Elmar Nəsibovun uşaq vaxtlarından hərb sənətinə böyük marağı olub. Hərbi xidmətdən sonra Silahlı Qüvvələrdə işləməyə başlayıb. Doqquz illik xidməti dövründə Şəmkir, Qazax, Gədəbəy, Daşkəsən və Beyləqanda işləyib. Xidməti dövründə bir sıra təltiflərə layiq görülüb. Vətən oğlu torpaqlarımızın düşmən tapdağı altında qalması ilə heç vaxt barışmayıb. 44 günlük müharibənin ilk günündən ön cəbhədə olub.

"Şahin gözlü” ləqəbi ilə tanınan peşəkar snayper olan Elmar Nəsibov Cəbrayıl və Füzuli rayonları istiqamətində gedən döyüşlərdə düşmənə sarsıdıcı zərbələr endirib, qüvvələrini məhv edib. Yaralı yoldaşlarını döyüş meydanından çıxarıb. 2020-ci ilin oktyabrın 12-də şəhidlik zirvəsinə ucalıb.

Ölümündən sonra "Vətən uğrunda", "Füzulinin azad olunmasına görə" və "Döyüşdə fərqlənməyə görə" medlları ilə təltif edilib.